چمک جگنو کی برق بے اماں معلوم ہوتی ہے — سیماب اکبر آبادی
شاعر
چمک جگنو کی برق بے اماں معلوم ہوتی ہے
چمک جگنو کی برق بے اماں معلوم ہوتی ہے
قفس میں رہ کے قدر آشیاں معلوم ہوتی ہے
کہانی میری روداد جہاں معلوم ہوتی ہے
جو سنتا ہے اسی کی داستاں معلوم ہوتی ہے
سحر تک سعیٔ نالہ رائیگاں معلوم ہوتی ہے
یہ دنیا تو بقدر یک فغاں معلوم ہوتی ہے
کسی کے دل میں گنجائش نہیں وہ بار ہستی ہوں
لحد کو بھی مری مٹی گراں معلوم ہوتی ہے
خزاں کے وقت بھی خاموش رہتی ہے فضا ساری
چمن کی پتی پتی راز داں معلوم ہوتی ہے
ہوائے شوق کی قوت وہاں لے آئی ہے مجھ کو
جہاں منزل بھی گرد کارواں معلوم ہوتی ہے
ترقی پر ہے روز افزوں خلش درد محبت کی
جہاں محسوس ہوتی تھی وہاں معلوم ہوتی ہے
قفس کی تیلیوں میں جانے کیا ترکیب رکھی ہے
کہ ہر بجلی قریب آشیاں معلوم ہوتی ہے
نہ کیوں سیمابؔ مجھ کو قدر ہو ویرانئ دل کی
یہ بنیاد نشاط دو جہاں معلوم ہوتی ہے
Chamak jugnu ki barq-e-be-amaan maloom hoti hai
Chamak jugnu ki barq-e-be-amaan maloom hoti hai
Qafas mein rah ke qadr-e-aashiyaan maloom hoti hai
Kahani meri rudada-e-jahan maloom hoti hai
Jo sunta hai usi ki daastaan maloom hoti hai
Sehar tak sa'i-e-naala raayegaan maloom hoti hai
Ye duniya to baqadr-e-yak fughaan maloom hoti hai
Kisi ke dil mein gunjaish nahin wo baar-e-hasti hoon
Lähad ko bhi meri mitti giraan maloom hoti hai
Khizaan ke waqt bhi khamosh rehti hai faza saari
Chaman ki patti patti raaz daan maloom hoti hai
Hawai-e-shauq ki quwwat wahan le aayi hai mujh ko
Jahan manzil bhi gard-e-karwaan maloom hoti hai
Taraqqi par hai roz afzoon khalish-e-dard-e-mohabbat ki
Jahan mehsoos hoti thi wahan maloom hoti hai
Qafas ki teeliyon mein jaane kya tarkeeb rakhi hai
Ke har bijli qareeb-e-aashiyaan maloom hoti hai
Na kyon Seemab mujh ko qadr ho veeranai-e-dil ki
Ye bunyaad-e-nishaat-e-do jahan maloom hoti hai
شاعر کے بارے میں
سیماب اکبرآبادی اردو ادب کے اُن ہمہ جہت اور عہدساز شعرا میں شمار ہوتے ہیں جنہوں نے شاعری، تنقید، ترجمہ اور ادارت ہر میدان میں گراں قدر خدمات انجام ...
مکمل تعارف پڑھیں