دیکھنا ہر صبح تجھ رخسار کا — ولی محمد ولی
شاعر
دیکھنا ہر صبح تجھ رخسار کا
دیکھنا ہر صبح تجھ رخسار کا
ہے مطالعہ مطلع انوار کا
بلبل و پروانہ کرنا دل کے تئیں
کام ہے تجھ چہرۂ گل نار کا
صبح تیرا درس پایا تھا صنم
شوق دل محتاج ہے تکرار کا
ماہ کے سینے اپر اے شمع رو
داغ ہے تجھ حسن کی جھلکار کا
دل کوں دیتا ہے ہمارے پیچ و تاب
پیچ تیرے طرۂ طرار کا
جو سنیا تیرے دہن سوں یک بچن
بھید پایا نسخۂ اسرار کا
چاہتا ہے اس جہاں میں گر بہشت
جا تماشا دیکھ اس رخسار کا
آرسی کے ہاتھ سوں ڈرتا ہے خط
چور کوں ہے خوف چوکیدار کا
سرکشی آتش مزاجی ہے سبب
ناصحوں کو گرمئ بازار کا
اے ولیؔ کیوں سن سکے ناصح کی بات
جو دوانا ہے پری رخسار کا
Dekhna har subh tujh rukhsar ka
Dekhna har subh tujh rukhsar ka
Hai mutaale'a matla'a-e-anwaar ka
Bulbul-o-parwana karna dil ke taeen
Kaam hai tujh chehra-e-gulnaar ka
Subh tera dars paaya tha sanam
Shauq-e-dil mohtaj hai takraar ka
Maah ke seene upar aye shama-ru
Daagh hai tujh husn ki jhilkaar ka
Dil kooñ deta hai hamare peech-o-taab
Peech tere turra-e-tarraar ka
Jo suniya tere dehan sooñ yak bachan
Bhed paaya nuskha-e-asraar ka
Chahta hai is jahañ mein gar bahisht
Ja tamasha dekh is rukhsar ka
Aarsi ke haath sooñ darta hai khat
Chor kooñ hai khauf chaukidaar ka
Sarkashi aatish-mizaji hai sabab
Nasehon ko garmi-e-bazaar ka
Aye Wali kyun sun sake naseh ki baat
Jo diwana hai pari rukhsar ka
شاعر کے بارے میں
ولی محمد ولی، جنہیں ادبی دنیا میں زیادہ تر ولی دکنی یا ولی اردو کے نام سے یاد کیا جاتا ہے، اردو غزل کے باقاعدہ بنیاد رکھنے والے پہلے عظیم شاعر مانے...
مکمل تعارف پڑھیں