جب تجھ عرق کے وصف میں جاری قلم ہوا — ولی محمد ولی
شاعر
جب تجھ عرق کے وصف میں جاری قلم ہوا
جب تجھ عرق کے وصف میں جاری قلم ہوا
عالم میں اس کا ناؤں جواہر رقم ہوا
نقطے پہ تیرے خال کے باندھا ہے جن نے دل
وو دائرہ میں عشق کے ثابت قدم ہوا
تجھ فطرت بلند کی خوبی کوں لکھ قلم
مشہور جگ کے بیچ عطارد رقم ہوا
طاقت نہیں کہ حشر میں ہووے وو دادخواہ
جس بے گنہ پہ تیری نگہ سوں ستم ہوا
بے منت شراب ہوں سر شار انبساط
تجھ نین کا خیال مجھے جام جم ہوا
جن نے بیاں لکھا ہے مرے رنگ زرد کا
اس کوں خطاب غیب سوں زریں رقم ہوا
شہرت ہوئی ہے جب سے ترے شعر کی ولیؔ
مشتاق تجھ سخن کا عرب تا عجم ہوا
Jab tujh araq ke vasf mein jaari qalam hua
Jab tujh araq ke vasf mein jaari qalam hua
Aalam mein us ka naaoñ jawahar raqam hua
Nuqte pe tere khaal ke baandha hai jin ne dil
Vo daera mein ishq ke saabit qadam hua
Tujh fitrat-e-buland ki khoobi kooñ likh qalam
Mashhoor jag ke beech atarud raqam hua
Taqat nahin ke hashr mein hove vo daad-khwah
Jis be-gunah pe teri nigah sooñ sitam hua
Be-minnat-e-sharaab hoon sarshaar-e-inbisaat
Tujh nain ka khayaal mujhe jaam-e-jam hua
Jin ne bayaan likha hai mere rang-e-zard ka
Us kooñ khitaab-e-ghaib sooñ zareen raqam hua
Shohrat huyi hai jab se tere she'r ki Wali
Mushtaq tujh sukhan ka arab ta ajam hua
شاعر کے بارے میں
ولی محمد ولی، جنہیں ادبی دنیا میں زیادہ تر ولی دکنی یا ولی اردو کے نام سے یاد کیا جاتا ہے، اردو غزل کے باقاعدہ بنیاد رکھنے والے پہلے عظیم شاعر مانے...
مکمل تعارف پڑھیں