عجیب ہے یہ سلسلہ — وزیر آغا
شاعر
عجیب ہے یہ سلسلہ
عجیب ہے یہ سلسلہ
یہ سلسلہ عجیب ہے
ہوا چلے تو کھیتیوں میں دھوم چہچہوں کی ہے
ہوا رکے تو مردنی ہے
مردنی کی راکھ کا نزول ہے
کہاں ہے تو کہاں ہے تو
کہاں نہیں ہے تو بتا
ابھی تھا تیرے گرتے اڑتے آنچلوں کا سلسلہ
اور اب افق پر دور تک
گئے دنوں کی دھول ہے
گئے دنوں کی دھول کا یہ سلسلہ فضول ہے
میں رو سکوں
تو کیا یہ گدلی کائنات دھل سکے گی
میرے آنسوؤں کے جھاگ سے
میں مسکرا سکوں
تو کیا سفر کی خستگی کو بھول کر یہ کارواں نجوم کے
برس پڑیں گے موتیے کے پھول بن کے
اس مہیب کاسۂ حیات میں
نہ تو سنے نہ میں کہوں
نہ میرے انگ انگ سے صدا اٹھے
یوں ہی میں آنسوؤں کو قہقہوں کو
اپنے دل میں دفن کر کے
گم
لبوں پہ سل دھرے
ترے نگر میں پا پیادہ پا برہنہ
شام کے فشار تک رواں رہوں
مگر کبھی
تری نظر کے آستاں کو
پار تک نہ کر سکوں
کہ تو ازل سے تا ابد
ہزار صد ہزار آنکھ والے وقت
کی نقیب ہے
یہ سلسلہ عجیب ہے
یہ سلسلہ عجیب ہے
Ajeeb hai yeh silsila
Ajeeb hai yeh silsila
Yeh silsila ajeeb hai
Hawa chale to khetiyon mein dhoom chehchahon ki hai
Hawa ruke to murdani hai
Murdani ki raakh ka nuzool hai
Kahan hai tu kahan hai tu
Kahan nahin hai tu bata
Abhi tha tere girte udte aanchalon ka silsila
Aur ab ufaq par door tak
Gaye dinon ki dhool hai
Gaye dinon ki dhool ka yeh silsila fazool hai
Main ro sakoon
To kya yeh gadli kainat dhal sakegi
Mere aansuon ke jhaag se
Main muskura sakoon
To kya safar ki khastagi ko bhool kar yeh karwaan nujoom ke
Baras padenge motiye ke phool ban ke
Is maheeb kasa-e-hayat mein
Na tu sune na main kahoon
Na mere ang ang se sada uthe
Yoon hi main aansuon ko qahqahon ko
Apne dil mein dafan kar ke
Gum
Labon pe sil dhare
Tere nagar mein pa-piyada pa-barahna
Shaam ke fishaar tak rawaan rahoon
Magar kabhi
Teri nazar ke aastan ko
Paar tak na kar sakoon
Ke tu azal se ta abad
Hazaar sad hazaar aankh wale waqt
Ki naqeeb hai
Yeh silsila ajeeb hai
Yeh silsila ajeeb hai
شاعر کے بارے میں
ڈاکٹر وزیر آغا 18 مئی 1922 کو ضلع سرگودھا کے گاؤں وزیر کوٹ میں پیدا ہوئے۔ ابتدائی تعلیم گورنمنٹ ہائی اسکول سے حاصل کی اور بعد میں گورنمنٹ کالج جھنگ...
مکمل تعارف پڑھیں