اشک دامن میں بھرے خواب کمر پر رکھا — احمد مشتاق
شاعر
اشک دامن میں بھرے خواب کمر پر رکھا
اشک دامن میں بھرے خواب کمر پر رکھا
پھر قدم ہم نے تری راہ گزر پر رکھا
ہم نے اک ہاتھ سے تھاما شب غم کا آنچل
اور اک ہاتھ کو دامان سحر پر رکھا
چلتے چلتے جو تھکے پاؤں تو ہم بیٹھ گئے
نیند گٹھری پہ دھری خواب شجر پر رکھا
جانے کس دم نکل آئے ترے رخسار کی دھوپ
مدتوں دھیان ترے سایۂ در پر رکھا
جاتے موسم نے پلٹ کر بھی نہ دیکھا مشتاقؔ
رہ گیا ساغر گل سبزۂ تر پر رکھا
احمد مشتاق
Ashk daman mein bhare khwab kamar par rakha
Ashk daman mein bhare khwab kamar par rakha
Phir qadam hum ne teri rahguzar par rakha
Hum ne ek haath se thama shab-e-gham ka aanchal
Aur ek haath ko daman-e-sahar par rakha
Chalte chalte jo thake paon to hum baith gaye
Neend gathri pe dhari khwab shajar par rakha
Jaane kis dam nikal aaye tere rukhsaar ki dhoop
Muddaton dhyan tere saye-dar par rakha
Jaate mausam ne palat kar bhi na dekha Mushtaq
Reh gaya sagar-e-gul sabza-e-tar par rakha
شاعر کے بارے میں
احمد مشتاق یکم مارچ 1933ء کو امرتسر، برطانوی ہندوستان میں پیدا ہوئے۔ تقسیمِ ہند کے بعد وہ پاکستان ہجرت کر گئے جہاں کچھ عرصہ لاہور میں مقیم رہے، بعد...
مکمل تعارف پڑھیں