پھر وہی رات پھر وہی آواز — احمد مشتاق
شاعر
پھر وہی رات پھر وہی آواز
پھر وہی رات پھر وہی آواز
میرے دل کی تھکی ہوئی آواز
کہیں باغ نخست سے آئی
کسی کوئل کی دکھ بھری آواز
ابھی چھایا نہیں ہے سناٹا
آ رہی ہے کوئی کوئی آواز
پھڑپھڑاہٹ کسی پرندے کی
کسی کونپل کی پھوٹتی آواز
ابھی محفوظ ہے ترا چہرہ
ابھی بھولی نہیں تری آواز
میرے بستر پہ آ کے لیٹ گئی
روشنی کی لکیر سی آواز
منہ اندھیرے جگا کے چھوڑ گئی
ایک صبح جمال کی آواز
دن سے فرصت کبھی ملے تو سنو
شام کا ساز رات کی آواز
گونجتا ہے ابھی ترانۂ شوق
وہی آہنگ ہے وہی آواز
ٹیڑھے میڑھے مڑے تڑے مکھڑے
ٹوٹی پھوٹی کٹی پھٹی آواز
بڑے دکھ جھیل کر کمائی ہے
جو بھی ہے یہ بری بھلی آواز
احمد مشتاق
Phir wahi raat phir wahi aawaz
Phir wahi raat phir wahi aawaz
Mere dil ki thaki hui aawaz
Kahin bagh-e-nakhust se aayi
Kisi koel ki dukh bhari aawaz
Abhi chhaya nahin hai sannata
Aa rahi hai koi koi aawaz
Phadphadahath kisi parinde ki
Kisi konpal ki phoot'ti aawaz
Abhi mehfooz hai tera chehra
Abhi bhooli nahin teri aawaz
Mere bistar pe aa ke let gayi
Roshni ki lakeer si aawaz
Munh andhere jaga ke chhod gayi
Ek subh-e-jamal ki aawaz
Din se fursat kabhi mile to suno
Sham ka saaz raat ki aawaz
Goonjta hai abhi tarana-e-shauq
Wahi aahang hai wahi aawaz
Tedhe medhe mude tude mukhde
Tooti phooti kati phati aawaz
Bade dukh jheel kar kamai hai
Jo bhi hai ye buri bhali aawaz
شاعر کے بارے میں
احمد مشتاق یکم مارچ 1933ء کو امرتسر، برطانوی ہندوستان میں پیدا ہوئے۔ تقسیمِ ہند کے بعد وہ پاکستان ہجرت کر گئے جہاں کچھ عرصہ لاہور میں مقیم رہے، بعد...
مکمل تعارف پڑھیں