ہے جستجو کہ خوب سے ہے خوب تر کہاں — الطاف حسین حالی
شاعر
ہے جستجو کہ خوب سے ہے خوب تر کہاں
ہے جستجو کہ خوب سے ہے خوب تر کہاں
اب ٹھہرتی ہے دیکھیے جا کر نظر کہاں
ہیں دور جام اول شب میں خودی سے دور
ہوتی ہے آج دیکھیے ہم کو سحر کہاں
یا رب اس اختلاط کا انجام ہو بخیر
تھا اس کو ہم سے ربط مگر اس قدر کہاں
اک عمر چاہیئے کہ گوارا ہو نیش عشق
رکھی ہے آج لذت زخم جگر کہاں
بس ہو چکا بیاں کسل و رنج راہ کا
خط کا مرے جواب ہے اے نامہ بر کہاں
کون و مکاں سے ہے دل وحشی کنارہ گیر
اس خانماں خراب نے ڈھونڈا ہے گھر کہاں
ہم جس پہ مر رہے ہیں وہ ہے بات ہی کچھ اور
عالم میں تجھ سے لاکھ سہی تو مگر کہاں
ہوتی نہیں قبول دعا ترک عشق کی
دل چاہتا نہ ہو تو زباں میں اثر کہاں
حالیؔ نشاط نغمہ و مے ڈھونڈھتے ہو اب
آئے ہو وقت صبح رہے رات بھر کہاں
Hai justuju ke khoob se hai khoob-tar kahan
Hai justuju ke khoob se hai khoob-tar kahan
Ab theherti hai dekhiye ja kar nazar kahan
Hain daur-e-jaam-e-awwal-e-shab mein khudi se door
Hoti hai aaj dekhiye hum ko sahar kahan
Ya Rabb is ikhtilaat ka anjaam ho bakhair
Tha us ko hum se rabt magar is qadar kahan
Ek umr chahiye ke gawara ho nesh-e-ishq
Rakhi hai aaj lazzat-e-zakhm-e-jigar kahan
Bas ho chuka bayaan kasal-o-ranj-e-raah ka
Khat ka mere jawab hai ae nama-bar kahan
Kawn-o-makan se hai dil-e-wahshi kinara-geer
Is khanma-kharaab ne dhunda hai ghar kahan
Hum jis pe mar rahe hain woh hai baat hi kuch aur
Alam mein tujh se lakh sahi tu magar kahan
Hoti nahin qubool dua tark-e-ishq ki
Dil chahta na ho to zabaan mein asar kahan
Hali! nishaat-e-naghma-o-may dhundhte ho ab
Aaye ho waqt-e-subh rahe raat bhar kahan