میں تو میں غیر کو مرنے سے اب انکار نہیں — الطاف حسین حالی
شاعر
میں تو میں غیر کو مرنے سے اب انکار نہیں
میں تو میں غیر کو مرنے سے اب انکار نہیں
اک قیامت ہے ترے ہاتھ میں تلوار نہیں
کچھ پتا منزل مقصود کا پایا ہم نے
جب یہ جانا کہ ہمیں طاقت رفتار نہیں
چشم بد دور بہت پھرتے ہیں اغیار کے ساتھ
غیرت عشق سے اب تک وہ خبردار نہیں
ہو چکا ناز اٹھانے میں ہے گو کام تمام
للہ الحمد کہ باہم کوئی تکرار نہیں
مدتوں رشک نے اغیار سے ملنے نہ دیا
دل نے آخر یہ دیا حکم کہ کچھ عار نہیں
اصل مقصود کا ہر چیز میں ملتا ہے پتا
ورنہ ہم اور کسی شے کے طلب گار نہیں
بات جو دل میں چھپاتے نہیں بنتی حالیؔ
سخت مشکل ہے کہ وہ قابل اظہار نہیں
main to main ghair ko marne se ab inkaar nahin
main to main ghair ko marne se ab inkaar nahin
ek qayamat hai tere haath mein talwar nahin
kuch pata manzil-e-maqsood ka paya hum ne
jab ye jaana ke humein taaqat-e-raftaar nahin
chashm-e-bad duur bahut phirte hain aghiyar ke saath
ghairat-e-ishq se ab tak woh khabardar nahin
ho chuka naaz uthane mein hai go kaam tamam
lillahil hamd ke baham koi takraar nahin
muddaton rashk ne aghiyar se milne na diya
dil ne aakhir ye diya hukm ke kuch aar nahin
asl-e-maqsood ka har cheez mein milta hai pata
warna hum aur kisi shai ke talabgar nahin
baat jo dil mein chhupate nahin banti Hali
sakht mushkil hai ke woh qabil-e-izhaar nahin