کوئی محرم نہیں ملتا جہاں میں — الطاف حسین حالی
شاعر
کوئی محرم نہیں ملتا جہاں میں
کوئی محرم نہیں ملتا جہاں میں
مجھے کہنا ہے کچھ اپنی زباں میں
قفس میں جی نہیں لگتا کسی طرح
لگا دو آگ کوئی آشیاں میں
کوئی دن بوالہوس بھی شاد ہو لیں
دھرا کیا ہے اشارات نہاں میں
کہیں انجام آ پہنچا وفا کا
گھلا جاتا ہوں اب کے امتحاں میں
نیا ہے لیجئے جب نام اس کا
بہت وسعت ہے میری داستاں میں
دل پر درد سے کچھ کام لوں گا
اگر فرصت ملی مجھ کو جہاں میں
بہت جی خوش ہوا حالیؔ سے مل کر
ابھی کچھ لوگ باقی ہیں جہاں میں
koi mehram nahin milta jahan mein
koi mehram nahin milta jahan mein
mujhe kehna hai kuch apni zaban mein
qafas mein jee nahin lagta kisi tarah
laga do aag koi aashiyan mein
koi din baul-hawas bhi shaad ho lein
dhara kya hai isharat-e-nihan mein
kahin anjaam aa pahuncha wafa ka
ghula jata hoon ab ke imtehan mein
naya hai leejiye jab naam us ka
bahut wusat hai meri dastaan mein
dil pur dard se kuch kaam loon ga
agar fursat mili mujh ko jahan mein
bahut jee khush hua Hali se mil kar
abhi kuch log baqi hain jahan mein