رنج اور رنج بھی تنہائی کا — الطاف حسین حالی
شاعر
رنج اور رنج بھی تنہائی کا
رنج اور رنج بھی تنہائی کا
وقت پہنچا مری رسوائی کا
عمر شاید نہ کرے آج وفا
کاٹنا ہے شب تنہائی کا
تم نے کیوں وصل میں پہلو بدلا
کس کو دعویٰ ہے شکیبائی کا
ایک دن راہ پہ جا پہنچے ہم
شوق تھا بادیہ پیمائی کا
اس سے نادان ہی بن کر ملیے
کچھ اجارہ نہیں دانائی کا
سات پردوں میں نہیں ٹھہرتی آنکھ
حوصلہ کیا ہے تماشائی کا
درمیاں پائے نظر ہے جب تک
ہم کو دعویٰ نہیں بینائی کا
کچھ تو ہے قدر تماشائی کی
ہے جو یہ شوق خود آرائی کا
اس کو چھوڑا تو ہے لیکن اے دل
مجھ کو ڈر ہے تری خود رائی کا
بزم دشمن میں نہ جی سے اترا
پوچھنا کیا تری زیبائی کا
یہی انجام تھا اے فصل خزاں
گل و بلبل کی شناسائی کا
مدد اے جذبۂ توفیق کہ یاں
ہو چکا کام توانائی کا
محتسب عذر بہت ہیں لیکن
اذن ہم کو نہیں گویائی کا
ہوں گے حالیؔ سے بہت آوارہ
گھر ابھی دور ہے رسوائی کا
ranj aur ranj bhi tanhai ka
ranj aur ranj bhi tanhai ka
waqt pahuncha meri ruswai ka
umar shayad na kare aaj wafa
kaatna hai shab-e-tanhai ka
tum ne kyun wasl mein pahlu badla
kis ko dawa hai shakebai ka
ek din raah pe ja pahunche hum
shauq tha badiyan paimai ka
us se nadan hi ban kar miliye
kuch ijarah nahin danai ka
saat pardo mein nahin theharti aankh
hausla kya hai tamashai ka
darmiyan paae nazar hai jab tak
hum ko dawa nahin bainai ka
kuch to hai qadr tamashai ki
hai jo ye shauq khud-arai ka
us ko chhoda to hai lekin ae dil
mujh ko dar hai teri khud-rai ka
bazm-e-dushman mein na jee se utra
poochna kya teri zebai ka
yehi anjaam tha ae fasl-e-khizan
gul o bulbul ki shanasai ka
madad ae jazba-e-taufeeq ke yahan
ho chuka kaam tawanaai ka
muhtasib uzr bahut hain lekin
izn hum ko nahin goyai ka
hon ge Hali se bahut awara
ghar abhi duur hai ruswai ka