واں اگر جائیں تو لے کر جائیں کیا — الطاف حسین حالی
شاعر
واں اگر جائیں تو لے کر جائیں کیا
واں اگر جائیں تو لے کر جائیں کیا
منہ اسے ہم جا کے یہ دکھلائیں کیا
دل میں ہے باقی وہی حرص گناہ
پھر کیے سے اپنے ہم پچھتائیں کیا
آؤ لیں اس کو ہمیں جا کر منا
اس کی بے پروائیوں پر جائیں کیا
دل کو مسجد سے نہ مندر سے ہے انس
ایسے وحشی کو کہیں بہلائیں کیا
جانتا دنیا کو ہے اک کھیل تو
کھیل قدرت کے تجھے دکھلائیں کیا
عمر کی منزل تو جوں توں کٹ گئی
مرحلے اب دیکھیے پیش آئیں کیا
دل کو سب باتوں کی ہے ناصح خبر
سمجھے سمجھائے کو بس سمجھائیں کیا
مان لیجے شیخ جو دعویٰ کرے
اک بزرگ دیں کو ہم جھٹلائیں کیا
ہو چکے حالیؔ غزل خوانی کے دن
راگنی بے وقت کی اب گائیں کیا
waan agar jaayen to le kar jaayen kya
waan agar jaayen to le kar jaayen kya
munh use hum ja ke ye dikhlayen kya
dil mein hai baqi wahi hirs-e-gunaah
phir kiye se apne hum pachtayen kya
aao lein us ko humein ja kar mana
us ki be-parwaaiyon par jaayen kya
dil ko masjid se na mandir se hai uns
aise wahshi ko kahin behlayen kya
jaanta duniya ko hai ek khel tu
khel-e-qudrat ke tujhe dikhlayen kya
umar ki manzil to jun-tun kat gayi
marhale ab dekhiye pesh aayen kya
dil ko sab baaton ki hai naaseh khabar
samjhe samjhaye ko bas samjhayen kya
maan leejiye shaikh jo dawa kare
ek buzurg-e-deen ko hum jhutlayen kya
ho chuke Hali ghazal khwani ke din
raagani be-waqt ki ab gaayen kya