حقیقت محرم اسرار سے پوچھ — الطاف حسین حالی
شاعر
حقیقت محرم اسرار سے پوچھ
حقیقت محرم اسرار سے پوچھ
مزا انگور کا مے خوار سے پوچھ
وفا اغیار کی اغیار سے سن
مری الفت در و دیوار سے پوچھ
ہماری آہ بے تاثیر کا حال
کچھ اپنے دل سے کچھ اغیار سے پوچھ
دلوں میں ڈالنا ذوق اسیری
کمند گیسوئے خم دار سے پوچھ
دل مہجور سے سن لذت وصل
نشاط عافیت بیمار سے پوچھ
نہیں جز گریۂ غم حاصل عشق
ہماری چشم دریا بار سے پوچھ
نہیں آب بقا جز جلوۂ دوست
کسی لب تشنۂ دیدار سے پوچھ
فریب وعدۂ دل دار کی قدر
شہید خنجر انکار سے پوچھ
فغان شوق کو مانع نہیں وصل
یہ نکتہ عندلیب زار سے پوچھ
تصور میں کیا کرتے ہیں جو ہم
وہ تصویر خیال یار سے پوچھ
متاع بے بہا ہے شعر حالیؔ
مری قیمت مری گفتار سے پوچھ
haqīqat mahram-e-asrār se pūchh
haqīqat mahram-e-asrār se pūchh
maza angūr kā mai-ḳhwār se pūchh
wafā aghyār kī aghyār se sun
merī ulfat dar-o-dīvār se pūchh
hamārī āh-e-be-tāsīr kā hāl
kuchh apne dil se kuchh aghyār se pūchh
diloñ meñ ḍālnā zauq-e-asīrī
kamand-e-gesū-e-ḳham-dār se pūchh
dil-e-mahjūr se sun lazzat-e-vasl
nishāt-e-āfiyat bīmār se pūchh
nahīñ juz girya-e-gham hāsil-e-ishq
hamārī chashm-e-daryā-bār se pūchh
nahīñ āb-e-baqā juz jalva-e-dost
kisī lab-tishna-e-dīdār se pūchh
fareb-e-wa'da-e-dil-dār kī qadr
shahīd-e-ḳhanjar-e-inkār se pūchh
faġhāñ-e-shauq ko māni' nahīñ vasl
ye nukta andalīb-e-zār se pūchh
tasavvur meñ kyā karte haiñ jo ham
vo tasvīr-e-ḳhayāl-e-yār se pūchh
matā-e-be-bahā hai shi'r-e-Hālī
merī qīmat merī guftār se pūchh