حق وفا کے جو ہم جتانے لگے — الطاف حسین حالی
شاعر
حق وفا کے جو ہم جتانے لگے
حق وفا کے جو ہم جتانے لگے
آپ کچھ کہہ کے مسکرانے لگے
تھا یہاں دل میں طعن وصل عدو
عذر ان کی زباں پہ آنے لگے
ہم کو جینا پڑے گا فرقت میں
وہ اگر ہمت آزمانے لگے
ڈر ہے میری زباں نہ کھل جائے
اب وہ باتیں بہت بنانے لگے
جان بچتی نظر نہیں آتی
غیر الفت بہت جتانے لگے
تم کو کرنا پڑے گا عذر جفا
ہم اگر درد دل سنانے لگے
سخت مشکل ہے شیوۂ تسلیم
ہم بھی آخر کو جی چرانے لگے
جی میں ہے لوں رضائے پیر مغاں
قافلے پھر حرم کو جانے لگے
سر باطن کو فاش کر یا رب
اہل ظاہر بہت ستانے لگے
وقت رخصت تھا سخت حالیؔ پر
ہم بھی بیٹھے تھے جب وہ جانے لگے
haq-e-wafā ke jo ham jatāne lage
haq-e-wafā ke jo ham jatāne lage
aap kuchh kah ke muskurāne lage
thā yahāñ dil meñ ta'n-e-vasl-e-adū
uzr un kī zabāñ pe āne lage
ham ko jīna paṛe gā furqat meñ
vo agar himmat āzmāne lage
ḍar hai merī zabāñ na khul jā'e
ab vo bāteñ bahut banāne lage
jān bachati nazar nahīñ ātī
ġhair ulfat bahut jatāne lage
tum ko karnā paṛe gā uzr-e-jafā
ham agar dard-e-dil sunāne lage
sakht mushkil hai shaiwa-e-taslīm
ham bhī ākhir ko jī churāne lage
jī meñ hai loñ razā-e-pīr-e-muġhāñ
qāfile phir haram ko jāne lage
sirr-e-bātin ko fāsh kar yā rab
ahl-e-zāhir bahut satāne lage
waqt-e-rukhsat thā sakht Hālī par
ham bhī baiṭhe the jab vo jāne lage