ایک ذاتی نظم — غلام محمد قاصر
شاعر
ایک ذاتی نظم
میں اکثر دیکھنے جاتا تھا اس کو جس کی ماں مرتی
اور اپنے دل میں کہتا تھا یہ کیسا شخص؟ ہے اب بھی
جیے جاتا ہے آخر کون اس کے گھر میں ہے جس کے
لیے یہ سختیاں سہتا ہے تکلیفیں اٹھاتا ہے
تھکن دن کی سمیٹے شب کو گھر جانے پہ کون اس کے
لیے دہلیز پر بیٹھا۔۔۔ دعا کی مشعلیں دل میں
جلائے۔۔۔ دیدۂ بے خواب کی ہر راہ دروازے
کی درزوں سے نکالے گا۔۔۔ خدا کی مہربانی اک
حقیقت ہی سہی کچھ قہر آلودہ بھی ہے۔۔۔ جو اس
کی نافرمانیاں کرتے ہیں ان کے واسطے اس نے
دہکتی آگ بھی تیار رکھی ہے۔۔۔ دل کافر
میں اس کی مہربانی اور رحمت کا تصور بھی
جب آیا مامتا کے لفظ کی صورت میں آیا ہے
مری ویران آنکھوں نے پھر ایسا وقت بھی دیکھا
کہ سورج جل رہا تھا روشنی منظر سے غائب تھی
خدا زندہ تھا لیکن اس کی رحمت سر سے غائب تھی
انہی آنکھوں میں میرے خیریت سے لوٹ آنے پر
نہ تھا اشک مسرت بھی۔۔۔ کہ میری راہ تکنا جن
کی بینائی کا مصرف تھا۔۔۔ وہ لب دو چار دن پہلے
مرے ماتھے پہ ہو کر ثبت جو کہتے تھے'' تم جاؤ
تمہاری نوکری کی بات ہے بیٹے! میں اچھی ہوں
مجھے اب جان کا خطرہ نہیں ہے اور اگر کچھ ہو
گیا تو ہم تمہیں فوراً بلا لیں گے چلے جاؤ''
(اگر مر جاؤں میں تو صبر کر لینا۔۔۔ خدا حافظ)
مگر یہ بات قاصرؔ ان لبوں سے کب سنی میں نے
اسے معلوم تھا شاید کہ مائیں مر نہیں سکتیں
دل اولاد میں اک یاد بن کر زندہ رہتی ہیں
بلایا تو گیا مجھ کو مگر وہ لب؟ کہاں وہ لب؟
مرے فاقہ زدہ بچپن کو نیندوں سے گریزاں، پا
کے جو پریوں کے افسانے سناتے تھے تو میں خوابوں
میں خود کو ان کے دسترخوانوں پر موجود پاتا تھا
سکت باقی نہیں ہے ان لبوں میں آج اتنی بھی
کہ میری خاطر اک حرف دعا کا بوجھ اٹھا لیتے
مجھے جو دیکھنے آتے ہیں کہتے ہیں میں زندہ ہوں
میں کھاتا ہوں کہ یہ بھی زندگی کی اک ضرورت ہے
مگر ہر ذائقے میں ایک تلخی کا اضافہ ہے
کسی دیوار کا سایہ ہو یا ہو پیڑ کی چھاؤں
مرا جسم برہنہ چھیدتی رہتی ہیں کرنیں اب
ہوا وہ ہاتھ غائب جو کہ میری ذات پر ہوتے
ہوئے ہر وار کو بڑھ بڑھ کے خود پر روک لیتا تھا
دعا کو ہاتھ اٹھاتا ہوں دعائیں اس کی خاطر ہیں
میں گویا ہوں کہ میری سب صدائیں اس کی خاطر ہیں
محبت اس کی خاطر ہے وفائیں اس کی خاطر ہیں
کہ میری ابتدائیں، انتہائیں اس کی خاطر ہیں
غلام محمد قاصر
Ek Zaati Nazm
Main aksar dekhne jata tha us ko jis ki maan marti
Aur apne dil mein kehta tha yeh kaisa shakhs? hai ab bhi
Jiye jata hai aakhir kaun us ke ghar mein hai jis ke
Liye yeh sakhtiyan sehta hai takleefen uthata hai
Thakan din ki samete shab ko ghar jaane pe kaun us ke
Liye dehleez par baitha... dua ki mash'alen dil mein
Jalaye... dida-e-be-khwab ki har raah darwaze
Ki darzon se nikale ga... Khuda ki meherbani ek
Haqeeqat hi sahi kuch qehar-alooda bhi hai... jo us
Ki nafarmaniyan karte hain un ke waaste us ne
Dehakti aag bhi taiyar rakhi hai... dil kafir
Mein us ki meherbani aur rehmat ka tasawwur bhi
Jab aaya mamta ke lafz ki surat mein aaya hai
Meri veeran aankhon ne phir aisa waqt bhi dekha
Ke suraj jal raha tha roshni manzar se ghaayab thi
Khuda zinda tha lekin us ki rehmat sar se ghaayab thi
Inhi aankhon mein mere khairiyat se laut aane par
Na tha ashk-e-musarrat bhi... ke meri raah takna jin
Ki beenai ka masraf tha... woh lab do char din pehle
Mere maathe pe ho kar sabt jo kehte the'' tum jao
Tumhari naukri ki baat hai bete! main achhi hoon
Mujhe ab jaan ka khatra nahin hai aur agar kuch ho
Gaya to hum tumhen fauran bula lenge chale jao...''
(Agar mar jaon main to sabr kar lena... Khuda hafiz)
Magar yeh baat Qasir un labon se kab suni main ne
Use maloom tha shayad ke maayein mar nahin saktin
Dil-e-aulad mein ek yaad ban kar zinda rehti hain
Bulaya to gaya mujh ko magar woh lab? kahan woh lab?
Mere faqa-zada bachpan ko neendon se gurezan, pa
Ke jo pariyon ke afsaane sunate the to main khwabon
Mein khud ko un ke dastarkhwanon par maujood paata tha
Sakat baqi nahin hai in labon mein aaj itni bhi
Ke meri khatir ek harf-e-dua ka bojh utha lete
Mujhe jo dekhne aate hain kehte hain main zinda hoon
Main khaata hoon ke yeh bhi zindagi ki ek zarurat hai
Magar har zaaiqe mein ek talkhi ka izafa hai
Kisi deewar ka saya ho ya ho ped ki chhaon
Mera jism barahna chhedti rehti hain kirnen ab
Hua woh haath ghaayab jo ke meri zaat par hote
Hue har waar ko badh badh ke khud par rok leta tha
Dua ko haath uthata hoon duain us ki khatir hain
Main goya hoon ke meri sab sadaen us ki khatir hain
Mohabbat us ki khatir hai wafaen us ki khatir hain
Ke meri ibtidaen, intehaen us ki khatir hain
شاعر کے بارے میں
ِغلام محمد قاصر جدید اردو غزل کے اُن اہم شعرا میں شمار ہوتے ہیں جنہوں نے روایت اور جدت کے امتزاج سے اپنی الگ شناخت قائم کی۔ ان کا اصل نام غلام محمد...
مکمل تعارف پڑھیں