کہف القحط — غلام محمد قاصر

Kehf ul Qaht

Peer Bakhsh Building se Peer Bakhsh ke marqad tak
Apni hi bakhshish ki dua'on ke karb-zaar se guzar kar aane waali
Sar par guzashta mah o saal ke kitne hi thaal uthaye
Aaj bhi ek qabr gum-gashta ka nishan aur apne ma'doom kal ke liye khitta-e-amaan
Ek saath dhoond rahi hai
Uss ke nange talwon se chhoone waali tapish ki lehar lehar use apne
Khilaunon se mehroom bachpan ke saath saath woh baharein bhi yaad dila jaati hai
Jab kisi an-dekhe jhonke se mehak uthne ki khwahish mein uss ke sapne
Pas-e-deewar murjha gaye aur uss ke baal chambeli ke phool bante gaye
Aur phir uss ki kalaiyon mein pehni hui jhurriyon mein talaai chooriyon
Ke aks jhilmilane lage
Abhi abhi ek be-tarteeb sahukar apne bikhre hue noton
Ko tarteeb dene ka jaan-gusal fareeza saranjam dete dete thak gaya
Maai Maryam ne pehle toh noton mein muqayyad zaruraton se mulaqat
Ki ek aur koshish ki
Aur phir ek nazar aasmaan par daali jaise wahan bhi koi rehta ho
Uss ki aankhon se nikalne ke liye be-taab hasraton mein se
Kuch toh un goliyon ko bhi bhigo gayin
Jinhein apne larazte haathon mein lete hi use yaqeen ho chala tha
Ke aaj raat use koi dard nahin satayega
Aur subah ko khansi ka daura bhi nahin padega
Magar kahan....
Bimariyan bhi aaj kal apne mizaaj mein bahut be-niyaz ho gayi hain