ہجر کے تپتے موسم میں بھی دل ان سے وابستہ ہے — غلام محمد قاصر
شاعر
ہجر کے تپتے موسم میں بھی دل ان سے وابستہ ہے
ہجر کے تپتے موسم میں بھی دل ان سے وابستہ ہے
اب تک یاد کا پتا پتا ڈالی سے پیوستہ ہے
مدت گزری دور سے میں نے ایک سفینہ دیکھا تھا
اب تک خواب میں آ کر شب بھر دریا مجھ کو ڈستا ہے
شام ابد تک ٹکرانے کا اذن نہیں ہے دونوں کو
چاند اسی پر گرم سفر ہے جو سورج کا رستہ ہے
تیز نہیں گر آنچ بدن کی جم جاؤگے رستے میں
اس بستی کو جانے والی پگڈنڈی یخ بستہ ہے
آیا ہے اک راہ نما کے استقبال کو اک بچہ
پیٹ ہے خالی آنکھ میں حسرت ہاتھوں میں گلدستہ ہے
لفظوں کا بیوپار نہ آیا اس کو کسی مہنگائی میں
کل بھی قاصرؔ کم قیمت تھا آج بھی قاصر سستا ہے
غلام محمد قاصر
Hijr ke tapte mausam mein bhi dil un se wabasta hai
Hijr ke tapte mausam mein bhi dil un se wabasta hai
Ab tak yaad ka patta patta dali se paiwasta hai
Muddat guzri door se main ne ek safeena dekha tha
Ab tak khwab mein aa kar shab bhar darya mujh ko dasta hai
Shaam-e-abad tak takrane ka azn nahin hai dono ko
Chand usi par garm-e-safar hai jo sooraj ka rasta hai
Tez nahin gar aanch badan ki jam jaoge raste mein
Is basti ko jaane wali pagdandi yakh basta hai
Aaya hai ik raah-numa ke isteqbal ko ik bachcha
Pet hai khaali aankh mein hasrat hathon mein guldasta hai
Lafzon ka beyopaar na aaya us ko kisi mehngai mein
Kal bhi Qasir kam qeemat tha aaj bhi Qasir sasta hai
شاعر کے بارے میں
ِغلام محمد قاصر جدید اردو غزل کے اُن اہم شعرا میں شمار ہوتے ہیں جنہوں نے روایت اور جدت کے امتزاج سے اپنی الگ شناخت قائم کی۔ ان کا اصل نام غلام محمد...
مکمل تعارف پڑھیں