نظر نظر میں ادائے جمال رکھتے تھے — غلام محمد قاصر
شاعر
نظر نظر میں ادائے جمال رکھتے تھے
نظر نظر میں ادائے جمال رکھتے تھے
ہم ایک شخص کا کتنا خیال رکھتے تھے
جبیں پہ آنے نہ دیتے تھے اک شکن بھی کبھی
اگرچہ دل میں ہزاروں ملال رکھتے تھے
خوشی اسی کی ہمیشہ نظر میں رہتی تھی
اور اپنی قوت غم بھی بحال رکھتے تھے
بس اشتیاق تکلم میں بارہا ہم لوگ
جواب دل میں زباں پر سوال رکھتے تھے
اسی سے کرتے تھے ہم روز و شب کا اندازہ
زمیں پہ رہ کے وہ سورج کی چال رکھتے تھے
جنوں کا جام محبت کی مے خرد کا خمار
ہمیں تھے وہ جو یہ سارے کمال رکھتے تھے
چھپا کے اپنی سسکتی سلگتی سوچوں سے
محبتوں کے عروج و زوال رکھتے تھے
کچھ ان کا حسن بھی تھا ماورا مثالوں سے
کچھ اپنا عشق بھی ہم بے مثال رکھتے تھے
خطا نہیں جو کھلے پھول راہ صرصر میں
یہ جرم ہے کہ وہ فکر مآل رکھتے تھے
غلام محمد قاصر
Nazar nazar mein ada-e-jamaal rakhte the
Nazar nazar mein ada-e-jamaal rakhte the
Hum ek shakhs ka kitna khayal rakhte the
Jabeen pe aane na dete the ik shikan bhi kabhi
Agarchi dil mein hazaron malaal rakhte the
Khushi ussi ki hamesha nazar mein rehti thi
Aur apni quwwat-e-gham bhi bahal rakhte the
Bas ishtiyaq-e-takallum mein barha hum log
Jawab dil mein zaban par sawal rakhte the
Usi se karte the hum roz-o-shab ka andaza
Zameen pe reh ke woh suraj ki chaal rakhte the
Junoon ka jaam mohabbat ki may, khirad ka khumar
Hamein the woh jo yeh saare kamaal rakhte the
Chhupa ke apni sisakti sulagti sochon se
Mohabbaton ke urooj-o-zawaal rakhte the
Kuchh un ka husn bhi tha mawra misalon se
Kuchh apna ishq bhi hum be-misal rakhte the
Khata nahin jo khile phool rah-e-sarsar mein
Yeh jurm hai ke woh fikr-e-maal rakhte the
شاعر کے بارے میں
ِغلام محمد قاصر جدید اردو غزل کے اُن اہم شعرا میں شمار ہوتے ہیں جنہوں نے روایت اور جدت کے امتزاج سے اپنی الگ شناخت قائم کی۔ ان کا اصل نام غلام محمد...
مکمل تعارف پڑھیں