شوق برہنہ پا چلتا تھا اور رستے پتھریلے تھے — غلام محمد قاصر
شاعر
شوق برہنہ پا چلتا تھا اور رستے پتھریلے تھے
شوق برہنہ پا چلتا تھا اور رستے پتھریلے تھے
گھستے گھستے گھس گئے آخر کنکر جو نوکیلے تھے
خار چمن تھے شبنم شبنم پھول بھی سارے گیلے تھے
شاخ سے ٹوٹ کے گرنے والے پتے پھر بھی پیلے تھے
سرد ہواؤں سے تو تھے ساحل کے ریت کے یارانے
لو کے تھپیڑے سہنے والے صحراؤں کے ٹیلے تھے
تابندہ تاروں کا تحفہ صبح کی خدمت میں پہنچا
رات نے چاند کی نذر کیے جو تارے کم چمکیلے تھے
سارے سپیرے ویرانوں میں گھوم رہے ہیں بین لیے
آبادی میں رہنے والے سانپ بڑے زہریلے تھے
تم یوں ہی ناراض ہوئے ہو ورنہ مے خانے کا پتا
ہم نے ہر اس شخص سے پوچھا جس کے نین نشیلے تھے
کون غلام محمد قاصرؔ بے چارے سے کرتا بات
یہ چالاکوں کی بستی تھی اور حضرت شرمیلے تھے
غلام محمد قاصر
Shauq barahna pa chalta tha aur raste pathriley the
Shauq barahna pa chalta tha aur raste pathriley the
Ghisste ghisste ghis gaye akhir kankar jo nokiley the
Khaar-e-chaman the shabnam shabnam phool bhi saare geelay the
Shaakh se toot ke girne wale patte phir bhi peele the
Sard hawaon se to the sahil ke ret ke yarane
Loo ke thapede sehne wale sehraon ke teele the
Tabinda taron ka tohfa subh ki khidmat mein pahuncha
Raat ne chand ki nazar kiye jo taare kam chamkeele the
Saare sapere veeranon mein ghoom rahe hain been liye
Abadi mein rehne wale saamp bade zehrile the
Tum yun hi naraz hue ho varna may-khane ka pata
Hum ne har us shakhs se poocha jis ke nain nasheele the
Kaun Ghulam Muhammad Qasirؔ bechare se karta baat
Yeh chalakon ki basti thi aur hazrat sharmile the
شاعر کے بارے میں
ِغلام محمد قاصر جدید اردو غزل کے اُن اہم شعرا میں شمار ہوتے ہیں جنہوں نے روایت اور جدت کے امتزاج سے اپنی الگ شناخت قائم کی۔ ان کا اصل نام غلام محمد...
مکمل تعارف پڑھیں