سوئے ہوئے جذبوں کو جگانا ہی نہیں تھا — غلام محمد قاصر
شاعر
سوئے ہوئے جذبوں کو جگانا ہی نہیں تھا
سوئے ہوئے جذبوں کو جگانا ہی نہیں تھا
اے دل وہ محبت کا زمانہ ہی نہیں تھا
مہکے تھے چراغ اور دہک اٹھی تھیں کلیاں
گو سب کو خبر تھی اسے آنا ہی نہیں تھا
دیوار پہ وعدوں کی امر بیل چڑھا دی
رخصت کے لیے اور بہانہ ہی نہیں تھا
اڑتی ہوئی چنگاریاں سونے نہیں دیتیں
روٹھے ہوئے اس خط کو جلانا ہی نہیں تھا
نیندیں بھی نظر بند ہیں تعبیر بھی قیدی
زنداں میں کوئی خواب سنانا ہی نہیں تھا
پانی تو ہے کم نقل مکانی ہے زیادہ
یہ شہر سرابوں میں بسانا ہی نہیں تھا
غلام محمد قاصر
Soye hue jazbon ko jagana hi nahin tha
Soye hue jazbon ko jagana hi nahin tha
Ae dil woh mohabbat ka zamana hi nahin tha
Mehkke the charagh aur dehak uthi thi kaliyan
Go sab ko khabar thi use aana hi nahin tha
Deewar pe waadon ki amar bel chadha di
Rukhsat ke liye aur bahana hi nahin tha
Udti hui chingariyan sone nahin detin
Roothe hue is khat ko jalana hi nahin tha
Neendein bhi nazar band hain ta'abeer bhi qaidi
Zindan mein koi khwab sunana hi nahin tha
Pani to hai kam naql-e-makani hai zyada
Yeh shehr sarabon mein basana hi nahin tha
شاعر کے بارے میں
ِغلام محمد قاصر جدید اردو غزل کے اُن اہم شعرا میں شمار ہوتے ہیں جنہوں نے روایت اور جدت کے امتزاج سے اپنی الگ شناخت قائم کی۔ ان کا اصل نام غلام محمد...
مکمل تعارف پڑھیں