گڑے مردوں نے اکثر زندہ لوگوں کی قیادت کی — اقبال ساجد
شاعر
گڑے مردوں نے اکثر زندہ لوگوں کی قیادت کی
گڑے مردوں نے اکثر زندہ لوگوں کی قیادت کی
مری راہوں میں بھی حائل ہیں دیواریں قدامت کی
نئی کرنیں پرانے آسماں میں کیوں جگہ پائیں
وہ کافر ہے کہ جس نے چڑھتے سورج کی عبادت کی
پرانی سیڑھیوں پر میں نئے قدموں کو کیوں رکھوں
گراؤں کس لئے چھت سر پہ بوسیدہ عمارت کی
ترا احساس بھی ہوگا کبھی میری طرح پتھر
نکل جائے گی آئینے سے پرچھائیں نزاکت کی
وہ میرا بت تھا جس کو میں نے اپنے ہاتھ سے توڑا
کہ برسوں کی یہ محنت ایک لمحے میں اکارت کی
اگر ہے نام کی خواہش تو دیواروں پہ چسپاں کر
بنا کر جھوٹ کے رنگوں سے تصویریں صداقت کی
ابھی سینوں میں لہراتے ہیں میری یاد کے پرچم
ابھی تک ثبت ہیں مہریں دلوں پر بادشاہت کی
ابھی سب حرف تازہ ہیں مکرتا کیوں ہے معنی سے
سیاہی خشک بھی ہونے نہیں پائی عبارت کی
کوئی میٹھے پھلوں کی آس میں کیوں تلخ دن کاٹے
کسے فرصت ہے ساجدؔ آج کل صبر و قناعت کی
اقبال ساجد
Gaṛe murdon ne aksar zinda logon ki qiyadat ki
Gaṛe murdon ne aksar zinda logon ki qiyadat ki
Meri rahon mein bhi haayal hain deewarain qadamat ki
Nayi kirnain purane aasman mein kyun jagah paayen
Woh kafir hai ke jis ne chaṛhte suraj ki ibadat ki
Purani seṛhiyon par main naye qadmon ko kyun rakhun
Giraun kis liye chhat sar pe boseeda imarat ki
Tera ehsas bhi hoga kabhi meri tarah patthar
Nikal jaayegi aaine se parchhaiyan nazakat ki
Woh mera but tha jis ko main ne apne haath se toṛa
Ke barson ki yeh mehnat ek lamhe mein akaarat ki
Agar hai naam ki khwahish to deewaron pe chispan kar
Bana kar jhooṭ ke rangon se tasweerain sadaqat ki
Abhi seeno mein lehrate hain meri yaad ke parcham
Abhi tak sabt hain mohrain dilon par badshahat ki
Abhi sab harf taza hain mukarta kyun hai ma'ani se
Siyahi khushk bhi hone nahin paayi ibarat ki
Koyi meeṭhe phalon ki aas mein kyun talkh din kaaṭe
Kise fursat hai Sajidؔ aaj kal sabr o qana'at ki
شاعر کے بارے میں
اقبال ساجد اردو کے معروف جدید غزل گو شعرا میں شمار ہوتے ہیں جن کا اصل نام محمد اقبال تھا۔ وہ 18 مئی 1932 کو لنڈھورا، ضلع سہارنپور (بھارت) میں پیدا ہوئے اور تقسیمِ ہند کے بعد پاکستان آکر لاہور میں مقیم ہوگئے۔ سادگی، داخلیت اور گہرے انسانی شعور نے ان کی شاعری کو معاصر شعرا سے ممتاز کیا۔ اگرچہ وہ صرف میٹرک تک تعلیم حاصل کرسکے، لیکن مطالعے، مشاہدے ...
مکمل تعارف پڑھیں