کاٹی نہیں تو ہر طرف پھیلے گی شاخ جبر کی — اقبال ساجد
شاعر
کاٹی نہیں تو ہر طرف پھیلے گی شاخ جبر کی
کاٹی نہیں تو ہر طرف پھیلے گی شاخ جبر کی
صبر کی بات چھوڑیئے ہوتی ہے حد بھی صبر کی
ڈھونڈ اب ایسی سرزمیں جس کی تمام کھیتیاں
مانگیں نہ آسمان سے بھیک کبھی بھی ابر کی
کرب کا بحر بیکراں چاروں طرف ہے موجزن
گھر میں گھڑی مقیم ہے کب سے عذاب قبر کی
پہلے تو گھر کے صحن میں دھوپ کی برچھیاں گریں
بعد میں چھت پہ آ گئی فوج غنیم ابر کی
بھیک میں لے کے جرأتیں آئے تو پاؤں جھڑ گئے
پھاند سکے نہ اس لئے لوگ فصیل جبر کی
راہ مراد اس لیے اور بھی دور ہو گئی
اس میں تھا قحط حوصلہ مجھ میں کمی تھی صبر کی
صحن میں پھول پھول جسم کھیل رہے ہیں ہر طرف
خوف نہیں ہے دھوپ کا فکر نہیں ہے ابر کی
اقبال ساجد
Kaati nahin to har taraf phailegi shakh-e-jabr ki
Kaati nahin to har taraf phailegi shakh-e-jabr ki
Sabr ki baat chhoRiye hoti hai had bhi sabr ki
DhooND ab aisi sarzamin jis ki tamam khetiyan
Maangein na aasmaan se bheek kabhi bhi abr ki
Karb ka bahr-e-bekaraan charon taraf hai maujzan
Ghar mein gaRhi muqeem hai kab se azab-e-qabr ki
Pehle to ghar ke sahn mein dhoop ki barchhiyan girein
Baad mein chhat pe aa gayi fauj-e-ghaneem abr ki
Bheek mein le ke jurratein aaye to paaon jhaR gaye
Phaand sake na is liye log faseel-e-jabr ki
Raah-e-murad is liye aur bhi door ho gayi
Is mein tha qaht-e-hausla mujh mein kami thi sabr ki
Sahn mein phool phool jism khel rahe hain har taraf
Khauf nahin hai dhoop ka fikr nahin hai abr ki
شاعر کے بارے میں
اقبال ساجد اردو کے معروف جدید غزل گو شعرا میں شمار ہوتے ہیں جن کا اصل نام محمد اقبال تھا۔ وہ 18 مئی 1932 کو لنڈھورا، ضلع سہارنپور (بھارت) میں پیدا ہوئے اور تقسیمِ ہند کے بعد پاکستان آکر لاہور میں مقیم ہوگئے۔ سادگی، داخلیت اور گہرے انسانی شعور نے ان کی شاعری کو معاصر شعرا سے ممتاز کیا۔ اگرچہ وہ صرف میٹرک تک تعلیم حاصل کرسکے، لیکن مطالعے، مشاہدے ...
مکمل تعارف پڑھیں