پتہ کیسے چلے دنیا کو قصر دل کے جلنے کا — اقبال ساجد
شاعر
پتہ کیسے چلے دنیا کو قصر دل کے جلنے کا
پتہ کیسے چلے دنیا کو قصر دل کے جلنے کا
دھوئیں کو راستہ ملتا نہیں باہر نکلنے کا
بتا پھولوں کی مسند سے اتر کے تجھ پہ کیا گزری
مرا کیا میں تو عادی ہو گیا کانٹوں پہ چلنے کا
مرے گھر سے زیادہ دور صحرا بھی نہیں لیکن
اداسی نام ہی لیتی نہیں باہر نکلنے کا
چڑھے گا زہر خوشبو کا اسے آہستہ آہستہ
کبھی بھگتے گا وہ خمیازہ پھولوں کو مسلنے کا
مسلسل جاگنے کے بعد خواہش روٹھ جاتی ہے
چلن سیکھا ہے بچے کی طرح اس نے مچلنے کا
زر دل لے کے پہنچا تھا متاع جاں بھی کھو بیٹھا
دیا اس نے نہ موقع بھی کف افسوس ملنے کا
خوشی سے کون کرتا ہے غموں کی پرورش ساجدؔ
کسے ہے شوق لوگو درد کے سانچے میں ڈھلنے کا
اقبال ساجد
Pata kaise chale duniya ko qasr-e-dil ke jalne ka
Pata kaise chale duniya ko qasr-e-dil ke jalne ka
Dhuein ko raasta milta nahin baahar nikalne ka
Bata phoolon ki masnad se utar ke tujh pe kya guzri
Mera kya main to aadi ho gaya kaanton pe chalne ka
Mere ghar se zyada door sehra bhi nahin lekin
Udaasi naam hi leti nahin baahar nikalne ka
Chadhega zehar khushboo ka use aahista aahista
Kabhi bhugtega woh khamyaza phoolon ko masalne ka
Musalsal jaagne ke baad khwahish rooth jaati hai
Chalan seekha hai bachche ki tarah us ne machalne ka
Zar-e-dil le ke pahuncha tha mataa-e-jaan bhi kho baitha
Diya us ne na mauqa bhi kaf-e-afsos malne ka
Khushi se kaun karta hai ghamon ki parvarish Sajid
Kise hai shauq logo dard ke saanche mein dhalne ka
شاعر کے بارے میں
اقبال ساجد اردو کے معروف جدید غزل گو شعرا میں شمار ہوتے ہیں جن کا اصل نام محمد اقبال تھا۔ وہ 18 مئی 1932 کو لنڈھورا، ضلع سہارنپور (بھارت) میں پیدا ہوئے اور تقسیمِ ہند کے بعد پاکستان آکر لاہور میں مقیم ہوگئے۔ سادگی، داخلیت اور گہرے انسانی شعور نے ان کی شاعری کو معاصر شعرا سے ممتاز کیا۔ اگرچہ وہ صرف میٹرک تک تعلیم حاصل کرسکے، لیکن مطالعے، مشاہدے ...
مکمل تعارف پڑھیں