پھینک یوں پتھر کہ سطح آب بھی بوجھل نہ ہو — اقبال ساجد
شاعر
پھینک یوں پتھر کہ سطح آب بھی بوجھل نہ ہو
پھینک یوں پتھر کہ سطح آب بھی بوجھل نہ ہو
نقش بھی بن جائے اور دریا میں بھی ہلچل نہ ہو
کھول یوں مٹھی کہ اک جگنو نہ نکلے ہاتھ سے
آنکھ کو ایسے جھپک لمحہ کوئی اوجھل نہ ہو
ہے سفر درپیش تو پرچھائیں کی انگلی پکڑ
راہ میں تنہائی کے احساس سے پاگل نہ ہو
پہلی سیڑھی پہ قدم رکھ آخری سیڑھی پہ آنکھ
منزلوں کی جستجو میں رائیگاں اک پل نہ ہو
ذہن خالی ہو گئے ہیں وقت کے احساس سے
سامنے وو مسئلہ رکھ جس کا کوئی حل نہ ہو
سب کے ہی سینوں میں ہے پھیلا ہوا سانسوں کا حبس
کوئی شہر ایسا نہیں جس کی فضا بوجھل نہ ہو
لوگ اکثر اپنے چہرے پر چڑھا لیتے ہیں خول
تو جسے سونا سمجھتا ہے کہیں پیتل نہ ہو
جستجو اس پیڑ کی کیوں ہو کہ جو سایہ نہ دے
ہاتھ اس ڈالی پہ کیا پہنچے کہ جس پر پھل نہ ہو
روز و شب لگتا رہے سوچوں کا میلہ ذہن میں
شور سے خالی کبھی احساس کا جنگل نہ ہو
گرم کر ساجدؔ لہو کو دھیمی دھیمی آنچ سے
وقت سے پہلے ترے جذبات میں ہلچل نہ ہو
اقبال ساجد
Phenk yun patthar ke sat'h-e-aab bhi bojhal na ho
Phenk yun patthar ke sat'h-e-aab bhi bojhal na ho
Naqsh bhi ban jaye aur darya mein bhi halchal na ho
Khol yun muTThi ke ek jugnu na nikle haath se
Aankh ko aise jhapak lamha koi ojhal na ho
Hai safar darpesh to parchhain ki ungli pakaD
Raah mein tanhai ke ehsas se pagal na ho
Pehli seeDhi pe qadam rakh aakhri seeDhi pe aankh
Manzilon ki justuju mein raigan ek pal na ho
Zehan khali ho gaye hain waqt ke ehsas se
Samne wo masla rakh jis ka koi hal na ho
Sab ke hi seenon mein hai phaila hua saanson ka habs
Koi shahr aisa nahin jis ki fiza bojhal na ho
Log aksar apne chehre par chaDha lete hain khol
Tu jise sona samajhta hai kahin peetal na ho
Justuju us peR ki kyon ho ke jo saya na de
Haath us Daali pe kya pahunche ke jis par phal na ho
Roz-o-shab lagta rahe sochon ka mela zehn mein
Shor se khali kabhi ehsas ka jangal na ho
Garm kar Sajid lahu ko dheemi dheemi aanch se
Waqt se pehle tere jazbaat mein halchal na ho
شاعر کے بارے میں
اقبال ساجد اردو کے معروف جدید غزل گو شعرا میں شمار ہوتے ہیں جن کا اصل نام محمد اقبال تھا۔ وہ 18 مئی 1932 کو لنڈھورا، ضلع سہارنپور (بھارت) میں پیدا ہوئے اور تقسیمِ ہند کے بعد پاکستان آکر لاہور میں مقیم ہوگئے۔ سادگی، داخلیت اور گہرے انسانی شعور نے ان کی شاعری کو معاصر شعرا سے ممتاز کیا۔ اگرچہ وہ صرف میٹرک تک تعلیم حاصل کرسکے، لیکن مطالعے، مشاہدے ...
مکمل تعارف پڑھیں