سنگ دل ہوں اس قدر آنکھیں بھگو سکتا نہیں — اقبال ساجد
شاعر
سنگ دل ہوں اس قدر آنکھیں بھگو سکتا نہیں
سنگ دل ہوں اس قدر آنکھیں بھگو سکتا نہیں
میں کہ پتھریلی زمیں میں پھول بو سکتا نہیں
لگ چکے ہیں دامنوں پر جتنے رسوائی کے داغ
ان کو آنسو کیا سمندر تک بھی دھو سکتا نہیں
ایک دو دکھ ہوں تو پھر ان سے کروں جی بھر کے پیار
سب کو سینے سے لگا لوں یہ تو ہو سکتا نہیں
تیری بربادی پہ اب آنسو بہاؤں کس لیے
میں تو خود اپنی تباہی پر بھی رو سکتا نہیں
جس نے سمجھا ہو ہمیشہ دوستی کو کاروبار
دوستو وہ تو کسی کا دوست ہو سکتا نہیں
خواہشوں کی نذر کر دوں کس لیے انمول اشک
کچے دھاگوں میں کوئی موتی پرو سکتا نہیں
میں ترے در کا بھکاری تو مرے در کا فقیر
آدمی اس دور میں خوددار ہو سکتا نہیں
مجھ کو اتنا بھی نہیں ہے سرخ رو ہونے کا شوق
بے سبب تازہ لہو کی فصل بو سکتا نہیں
یاد کے شعلوں پہ جلتا ہے اگر میرا بدن
اوڑھ کر پھولوں کی چادر تو بھی سو سکتا نہیں
ہاتھ جس سے کچھ نہ آئے اس کی خواہش کیوں کروں
دودھ کی مانند میں پانی بلو سکتا نہیں
اقبال ساجد
Sangdil hun is qadar aankhen bhigo sakta nahin
Sangdil hun is qadar aankhen bhigo sakta nahin
Main keh pathreeli zameen mein phool bo sakta nahin
Lag chuke hain damanon par jitne ruswai ke daagh
Un ko aansu kya samundar tak bhi dho sakta nahin
Ek do dukh hon to phir un se karun jee bhar ke pyar
Sab ko seene se laga loon ye to ho sakta nahin
Teri barbadi pe ab aansu bahaun kis liye
Main to khud apni tabahi par bhi ro sakta nahin
Jis ne samjha ho hamesha dosti ko karobar
Dosto wo to kisi ka dost ho sakta nahin
Khwahishon ki nazr kar dun kis liye anmol ashq
Kachche dhaagon mein koi moti paro sakta nahin
Main tere dar ka bhikari tu mere dar ka faqeer
Aadmi is daur mein khuddar ho sakta nahin
Mujh ko itna bhi nahin hai surkh-ru hone ka shauq
Be-sabab taza lahu ki fasl bo sakta nahin
Yaad ke sholon pe jalta hai agar mera badan
Odh kar phoolon ki chadar tu bhi so sakta nahin
Haath jis se kuch na aaye us ki khwahish kyon karun
Doodh ki manind main pani bilo sakta nahin
شاعر کے بارے میں
اقبال ساجد اردو کے معروف جدید غزل گو شعرا میں شمار ہوتے ہیں جن کا اصل نام محمد اقبال تھا۔ وہ 18 مئی 1932 کو لنڈھورا، ضلع سہارنپور (بھارت) میں پیدا ہوئے اور تقسیمِ ہند کے بعد پاکستان آکر لاہور میں مقیم ہوگئے۔ سادگی، داخلیت اور گہرے انسانی شعور نے ان کی شاعری کو معاصر شعرا سے ممتاز کیا۔ اگرچہ وہ صرف میٹرک تک تعلیم حاصل کرسکے، لیکن مطالعے، مشاہدے ...
مکمل تعارف پڑھیں