اب اس سے بڑھ کے کیا ناکامیاں ہوں گی مقدر میں — مضطر خیرآبادی
شاعر
اب اس سے بڑھ کے کیا ناکامیاں ہوں گی مقدر میں
اب اس سے بڑھ کے کیا ناکامیاں ہوں گی مقدر میں
میں جب پہنچا تو کوئی بھی نہ تھا میدان محشر میں
الٰہی نہر رحمت بہہ رہی ہے اس میں ڈلوا دے
گنہ گاروں کے عصیاں باندھ کر دامان محشر میں
کھلے گیسو تو دیدار خدا بھی ہو گیا مشکل
قیامت کا اندھیرا چھا گیا میدان محشر میں
شریک کثرت مخلوق تو کیوں ہو گیا یا رب
تری وحدت کا پردہ کیا ہوا میدان محشر میں
قیامت تو ہماری تھی ہم آپس میں نبٹ لیتے
کوئی پوچھے خدا کیوں آ گیا میدان محشر میں
کسی کا آبلہ پا قبر سے یہ پوچھتا اٹھا
کہیں تھوڑے بہت کانٹے بھی ہیں میدان محشر میں
الٰہی درد کے قصے بہت ہیں وقت تھوڑا ہے
شب فرقت کا دامن باندھ دے دامان محشر میں
نہ اٹھتے کشتگان ناز ہرگز اپنی تربت سے
تری آواز شامل ہو گئی تھی صور محشر میں
تہہ مدفن مجھے رہتے زمانہ ہو گیا مضطرؔ
کچھ ایسی نیند سویا ہوں کہ اب جاگوں گا محشر میں
Ab is se badh ke kya nakamiyan hongi muqaddar mein
Ab is se badh ke kya nakamiyan hongi muqaddar mein
Main jab pahuncha to koi bhi na tha maidan-e-mehshar mein
Ilahi nahr-e-rehmat beh rahi hai is mein dalwa de
Gunahgaron ke isyaan baandh kar daman-e-mehshar mein
Khule gesu to didar-e-khuda bhi ho gaya mushkil
Qayamat ka andhera chha gaya maidan-e-mehshar mein
Shareek-e-kasrat-e-makhlooq tu kyun ho gaya ya Rab
Teri wahdat ka parda kya hua maidan-e-mehshar mein
Qayamat to hamari thi hum aapas mein nibat lete
Koi poochhe Khuda kyun aa gaya maidan-e-mehshar mein
Kisi ka aabla-pa qabr se yeh poochhta utha
Kaheen thode bahut kaante bhi hain maidan-e-mehshar mein
Ilahi dard ke qisse bahut hain waqt thoda hai
Shab-e-furqat ka daman baandh de daman-e-mehshar mein
Na uthte kushtgan-e-naaz hargiz apni turbat se
Teri awaz shamil ho gai thi soor-e-mehshar mein
Teh-e-madfan mujhe rehte zamana ho gaya Muztarؔ
Kuchh aisi neend soya hoon ke ab jagunga mehshar mein
شاعر کے بارے میں
مضطرؔ خیرآبادی اردو ادب کے اُن ممتاز کلاسیکی شعرا میں شمار ہوتے ہیں جن کی شاعری میں مذہبی شعور، روحانی گہرائی اور خالص مشرقی تہذیب کا عکس نمایاں ہے...
مکمل تعارف پڑھیں