جنوں کے جوش میں انسان رسوا ہو ہی جاتا ہے — مضطر خیرآبادی
شاعر
جنوں کے جوش میں انسان رسوا ہو ہی جاتا ہے
جنوں کے جوش میں انسان رسوا ہو ہی جاتا ہے
گریباں پھاڑنے سے فاش پردا ہو ہی جاتا ہے
محبت خوف رسوائی کا باعث بن ہی جاتی ہے
طریق عشق میں اپنوں سے پردا ہو ہی جاتا ہے
جوانی وصل کی لذت پہ راغب کر ہی دیتی ہے
تمہیں اس بات کا غم کیوں ہے ایسا ہو ہی جاتا ہے
بگڑتے کیوں ہو آپس میں شکایت کر ہی لیتے ہیں
عدو کا تذکرہ دشمن کا چرچا ہو ہی جاتا ہے
تمہاری نرگس بیمار اچھا کر ہی دیتی ہے
جسے تم دیکھ لیتے ہو وہ اچھا ہو ہی جاتا ہے
اکیلا پا کے ان کو عرض مطلب کر ہی لیتا ہوں
نہ چاہوں تو بھی اظہار تمنا ہو ہی جاتا ہے
مرا دعوئ عشق اغیار باطل کر ہی دیتے ہیں
جسے جھوٹا بنا لیں یار جھوٹا ہو ہی جاتا ہے
بتان بے وفا مضطرؔ دل و دیں کر ہی لیتے ہیں
تمہیں پر کچھ نہیں موقوف ایسا ہو ہی جاتا ہے
Junoon ke josh mein insan ruswa ho hi jata hai
Junoon ke josh mein insan ruswa ho hi jata hai
Gareban phaadne se faash parda ho hi jata hai
Mohabbat khauf-e-ruswai ka baais ban hi jati hai
Tareeq-e-ishq mein apnon se parda ho hi jata hai
Jawani vasl ki lazzat pe raghib kar hi deti hai
Tumhein is baat ka gham kyun hai aisa ho hi jata hai
Bigadte kyun ho aapas mein shikayat kar hi lete hain
Adu ka tazkira dushman ka charcha ho hi jata hai
Tumhari nargis-e-bimar achha kar hi deti hai
Jise tum dekh lete ho wo achha ho hi jata hai
Akela pa ke un ko arz-e-matlab kar hi leta hoon
Na chahoon to bhi izhar-e-tamanna ho hi jata hai
Mera dawa-e-ishq aghyar batil kar hi dete hain
Jise jhoota bana len yaar jhoota ho hi jata hai
Butan-e-bewafa Muztar dil o deen kar hi lete hain
Tumhein par kuch nahin mauqoof aisa ho hi jata hai
شاعر کے بارے میں
مضطرؔ خیرآبادی اردو ادب کے اُن ممتاز کلاسیکی شعرا میں شمار ہوتے ہیں جن کی شاعری میں مذہبی شعور، روحانی گہرائی اور خالص مشرقی تہذیب کا عکس نمایاں ہے...
مکمل تعارف پڑھیں