محبت باعث نا مہربانی ہوتی جاتی ہے — مضطر خیرآبادی
شاعر
محبت باعث نا مہربانی ہوتی جاتی ہے
محبت باعث نا مہربانی ہوتی جاتی ہے
ہماری ساری محنت دھول دھانی ہوتی جاتی ہے
حکایت ہوں جو راتوں کو ہمیشہ ہوتی رہتی ہے
شکایت ہوں جو آپس میں زبانی ہوتی جاتی ہے
ترا غم آج تک تازہ ہے ظالم ورنہ دنیا میں
نئی شے دن گزرنے سے پرانی ہوتی جاتی ہے
تمہاری یاد میں اہل جہاں مر مر کے جیتے ہیں
قضا لوگوں کے حق میں زندگانی ہوتی جاتی ہے
بڑا الزام ٹھہرا ہے تعلق رشتہ داری کا
قرابت کی محبت بد گمانی ہوتی جاتی ہے
یہی تنبیہ ملنے پر انہیں مجبور کرتی ہے
یہی تاکید گویا ضد کی بانی ہوتی جاتی ہے
مرے غم میں وہ مجبوری سے ان حالوں کو پہنچے ہیں
کہ اب ان کی نزاکت ناتوانی ہوتی جاتی ہے
ترے کوچے میں اب گردش کی صورت پڑتی جاتی ہے
زمیں کی چال دور آسمانی ہوتی جاتی ہے
مرے پہلو میں دل کب تھا لہو کی بوند تھی مضطرؔ
سو اب وہ بوند بھی قسمت سے پانی ہوتی جاتی ہے
Mohabbat bais-e-na-meherbani hoti jaati hai
Mohabbat bais-e-na-meherbani hoti jaati hai
Hamari sari mehnat dhool-dhani hoti jaati hai
Hikayat hon jo raaton ko hamesha hoti rehti hai
Shikayat hon jo aapas mein zubani hoti jaati hai
Tera gham aaj tak taza hai zaalim warna duniya mein
Nayi shai din guzarnay se purani hoti jaati hai
Tumhari yaad mein ahl-e-jahan mar mar ke jeete hain
Qaza logon ke haq mein zindagani hoti jaati hai
Bada ilzam thehra hai ta'alluq rishtedari ka
Qarabat ki mohabbat bad-gumani hoti jaati hai
Yehi tanbeeh milne par unhein majboor karti hai
Yehi takeed goya zid ki baani hoti jaati hai
Mere gham mein woh majboori se in haalon ko pahunche hain
Ke ab un ki nazakat natwani hoti jaati hai
Tere kuche mein ab gardish ki surat padti jaati hai
Zameen ki chaal dour aasmani hoti jaati hai
Mere pehlu mein dil kab tha lahoo ki boond thi Muztar
So ab woh boond bhi qismat se paani hoti jaati hai
شاعر کے بارے میں
مضطرؔ خیرآبادی اردو ادب کے اُن ممتاز کلاسیکی شعرا میں شمار ہوتے ہیں جن کی شاعری میں مذہبی شعور، روحانی گہرائی اور خالص مشرقی تہذیب کا عکس نمایاں ہے...
مکمل تعارف پڑھیں