وفا کیا کر نہیں سکتے ہیں وہ لیکن نہیں کرتے — مضطر خیرآبادی
شاعر
وفا کیا کر نہیں سکتے ہیں وہ لیکن نہیں کرتے
وفا کیا کر نہیں سکتے ہیں وہ لیکن نہیں کرتے
کہا کیا کر نہیں سکتے ہیں وہ لیکن نہیں کرتے
مسیحائی کا دعویٰ اور بیماروں سے یہ غفلت
دوا کیا کر نہیں سکتے ہیں وہ لیکن نہیں کرتے
رقیبوں پر عدو پر غیر پر چرخ ستم گر پر
جفا کیا کر نہیں سکتے ہیں وہ لیکن نہیں کرتے
کبھی داد محبت دے کے حق میری وفاؤں کا
ادا کیا کر نہیں سکتے ہیں وہ لیکن نہیں کرتے
زکات حسن دے کر اپنے کوچے کے گداؤں کا
بھلا کیا کر نہیں سکتے ہیں وہ لیکن نہیں کرتے
دل مضطرؔ کو قید دام گیسوئے پریشاں سے
رہا کیا کر نہیں سکتے ہیں وہ لیکن نہیں کرتے
Wafa kiya kar nahin sakte hain woh lekin nahin karte
Wafa kiya kar nahin sakte hain woh lekin nahin karte
Kaha kiya kar nahin sakte hain woh lekin nahin karte
Maseehai ka dawa aur beemaron se yeh ghaflat
Dawa kiya kar nahin sakte hain woh lekin nahin karte
Raqeebon par adu par ghair par charkh-e-sitamgar par
Jafa kiya kar nahin sakte hain woh lekin nahin karte
Kabhi dad-e-mohabbat de kar haq meri wafaaon ka
Ada kiya kar nahin sakte hain woh lekin nahin karte
Zakat-e-husn de kar apne kooche ke gadaaon ka
Bhala kiya kar nahin sakte hain woh lekin nahin karte
Dil-e-Muztar ko qaid-e-daam-e-gesoo-e-pareshan se
Riha kiya kar nahin sakte hain woh lekin nahin karte
شاعر کے بارے میں
مضطرؔ خیرآبادی اردو ادب کے اُن ممتاز کلاسیکی شعرا میں شمار ہوتے ہیں جن کی شاعری میں مذہبی شعور، روحانی گہرائی اور خالص مشرقی تہذیب کا عکس نمایاں ہے...
مکمل تعارف پڑھیں