وقت آخر یاد ہے ساقی کی مہمانی مجھے — مضطر خیرآبادی
شاعر
وقت آخر یاد ہے ساقی کی مہمانی مجھے
وقت آخر یاد ہے ساقی کی مہمانی مجھے
مرتے مرتے دے دیا انگور کا پانی مجھے
وہ مری صورت تو دیکھیں اپنی صورت کے لیے
کاش آئینہ بنا دے میری حیرانی مجھے
کٹ گیا ہے وصل سے پہلے زمانہ عمر کا
ہائے دھوکا دے گیا بہتا ہوا پانی مجھے
دامن صحرا سے لوں گا مر کے وحشت میں کفن
اک نیا جوڑا پنہائے گی یہ عریانی مجھے
میرے گل کو لا یا اپنے پھول لے جا عندلیب
ایسے کانٹوں سے نہیں پھانسیں نکلوانی مجھے
تم اگر چاہو تو مٹی سے ابھی پیدا ہوں پھول
میں اگر مانگوں تو دریا بھی نہ دے پانی مجھے
تشنہ کامی اس کو کہتے ہیں کہ بحر عشق میں
میں اگر اتروں تو اوپر پھینک دے پانی مجھے
ایسی مشکل تم نے ڈالی ہے کہ جب مر جاؤں گا
مدتوں رویا کرے گی میری آسانی مجھے
تو نے اتنی دی کہ مے خواری کی حسرت بہہ گئی
میں نے اتنی پی کہ آخر ہو گئی پانی مجھے
رونے جاتا ہوں میں اپنی حسرتوں کے ڈھیر پر
بے کسی آ کر سکھا دے مرثیہ خوانی مجھے
حشر میں چلنا پڑے گا ایک ٹیڑھا راستہ
کوچۂ جاناں سکھا دے ٹھوکریں کھانی مجھے
مضطرؔ اپنے حق کے کانٹے چن کے میں رخصت ہوا
اور کیا دیتی بہار گلشن فانی مجھے
Waqt-e-aakhir yaad hai Saqi ki mehmani mujhe
Waqt-e-aakhir yaad hai Saqi ki mehmani mujhe
Marte marte de diya angoor ka paani mujhe
Woh meri soorat to dekhein apni soorat ke liye
Kaash aaina bana de meri hairani mujhe
Kat gaya hai vasl se pahle zamana umr ka
Haye dhoka de gaya bahta hua paani mujhe
Daman-e-sahra se loonga mar ke vahshat mein kafan
Ek naya joda pahnayegi yeh uryaani mujhe
Mere gul ko la ya apne phool le ja Andalib
Aise kaanton se nahin phansein niklwani mujhe
Tum agar chaho to mitti se abhi paida hon phool
Main agar maangoon to darya bhi na de paani mujhe
Tishna-kami is ko kahte hain ki bahr-e-ishq mein
Main agar utroon to oopar phenk de paani mujhe
Aisi mushkil tum ne daali hai ki jab mar jaaoonga
Muddaton roya karegi meri aasani mujhe
Tu ne itni di ki mai-khwari ki hasrat bah gai
Main ne itni pi ki aakhir ho gai paani mujhe
Rone jaata hoon main apni hasraton ke dher par
Be-kasi aa kar sikha de marsiya-khwani mujhe
Hashr mein chalna padega ek tedha rasta
Koocha-e-jaanan sikha de thokarein khani mujhe
Muztar apne haq ke kaante chun ke main rukhsat hua
Aur kya deti bahar-e-gulshan-e-faani mujhe
شاعر کے بارے میں
مضطرؔ خیرآبادی اردو ادب کے اُن ممتاز کلاسیکی شعرا میں شمار ہوتے ہیں جن کی شاعری میں مذہبی شعور، روحانی گہرائی اور خالص مشرقی تہذیب کا عکس نمایاں ہے...
مکمل تعارف پڑھیں