تنہائی — پیرزادہ قاسم
شاعر
تنہائی
اس صف میں بھی سب دشمن ہیں
اس صف میں بھی سب دشمن ہیں
جو آنکھوں میں آنکھیں ڈالے
اور دل میں نفرت کو پالے
بارود کے ڈھیر پہ بیٹھے ہیں
بس اک ساعت کی دوری پر
اس انساں کی مجبوری پر
کوئی رونے والا بھی تو نہیں
کوئی ہنسنے والا بھی تو نہیں
اس ساعت خوں آشام سے تھی
وہ ساری رونق منظر کی
اس ساعت دل آزار سے ہے
اک زرد اداس سی خاموشی
اس منظر سے اس منظر تک
اک منظر تھا اب وہ بھی نہیں
اک کٹنے والی گردن تھی
اک خنجر تھا اب وہ بھی نہیں
اب وہ بھی نہیں جو دیکھتے ہوں
یہ جیت ہوئی یا ہار ہوئی
اب وہ بھی نہیں جو کہتے ہوں
یہ زیست ہمیں آزار ہوئی
اب وہ بھی نہیں جو لکھتے ہوں
احوال جسے تاریخ کہیں
اب یہ بھی نہیں کہ یہ لاشے
مٹی میں ملیں گلزار بنیں
اب انساں کھیت نہ حیواں ہیں
گھر مدرسے دفتر اور نہ ملیں
انگشت کی اک جنبش سے کہیں
میزائل داغا جا بھی چکا
اک جوہری رقص کے تھمنے تک
جو دور حیات تھا جا بھی چکا
اس زیست کے بندی خانے سے
ہم مثل اجل آزاد ہوئے
یہ کیسے ملک بسائے تھے
اک لمحے میں برباد ہوئے
ہے آخری منظر تاراجی
ہوں جس کا ایک حوالہ میں
یہ منظر کیسا منظر ہے
جسے تنہا دیکھنے والا میں
اب اس صف میں بھی کوئی نہیں
اب اس صف میں بھی کوئی نہیں
میں تنہا بیٹھا سوچتا ہوں
کچھ جینے کا امکان تو ہو
آ بیٹھے پاس جو دشمن کے
دشمن ہی سہی انسان تو ہو
پیرزادہ قاسم
Tanhaai
Is saf mein bhi sab dushman hain
Is saf mein bhi sab dushman hain
Jo aankhon mein aankhen daale
Aur dil mein nafrat ko paale
Barood ke dher pe baithe hain
Bas ek saa'at ki doori par
Is insaan ki majboori par
Koi rone wala bhi to nahin
Koi hansne wala bhi to nahin
Is saa'at-e-khoon-aasham se thi
Wo saari raunaq manzar ki
Is saa'at-e-dil-aazaar se hai
Ik zard udaas si khamoshi
Is manzar se us manzar tak
Ek manzar tha ab wo bhi nahin
Ik katne wali gardan thi
Ik khanjar tha ab wo bhi nahin
Ab wo bhi nahin jo dekhte hon
Yeh jeet hui ya haar hui
Ab wo bhi nahin jo kehte hon
Yeh zeest hamein aazaar hui
Ab wo bhi nahin jo likhte hon
Ahwaal jise tareekh kahein
Ab yeh bhi nahin ke yeh laashe
Mitti mein milein gulzaar banein
Ab insaan kheet na haiwaan hain
Ghar, madarse, daftar aur na milein
Angusht ki ek jumbish se kahin
Missile daagha jaa bhi chuka
Ik johari raqs ke thamne tak
Jo daur-e-hayaat tha jaa bhi chuka
Is zeest ke bandi khaane se
Hum misl-e-ajal azaad hue
Yeh kaise mulk basaaye the
Ek lamhe mein barbaad hue
Hai aakhri manzar-e-taaraaji
Hoon jis ka ek hawala main
Yeh manzar kaisa manzar hai
Jise tanha dekhne wala main
Ab is saf mein bhi koi nahin
Ab is saf mein bhi koi nahin
Main tanha baitha sochta hoon
Kuch jeene ka imkaan to ho
Aa baithe paas jo dushman ke
Dushman hi sahi, insaan to ho
شاعر کے بارے میں
پیرزادہ قاسم رضا صدیقی اردو ادب کے ممتاز شاعر، دانشور، ماہرِ تعلیم اور سائنس دان ہیں جنہوں نے ادب اور علم دونوں میدانوں میں نمایاں خدمات انجام دی ہ...
مکمل تعارف پڑھیں