زلزلہ آٹھ اکتوبر 2005 — پیرزادہ قاسم
شاعر
زلزلہ آٹھ اکتوبر 2005
اس روشن صبح کے دامن میں
اک سورج قہر کا چمکا تھا
اک تارا جی کا نغمہ تھا
جو وادی وادی گونجا تھا
اک پروائی تھی وحشت کی
اک فطرت کا نقارا تھا
نادیدہ تھا وہ دست اجل
جو دشت و جبل لرزاتا تھا
اور پاؤں تلے سے دھرتی کو
بے وہم و گماں سرکاتا تھا
اک کھیل رہا کچھ لمحوں کا
کچھ لمحے تھے جو آئے گئے
سب نوحے نیست کے نوحے تھے
نابود کی تال پہ گائے گئے
بستی اور بستی والے سب
ملبے کے تلے دفنائے گئے
اب جھیلنے والے جھیلیں گے
جو دکھ ہے بچھڑنے والوں کا
اک آگ فراق کی دہکی ہے
یہ رستہ ہے انگاروں کا
بس اس پر چلنا اور جلنا
مقدور ہے غم کے ماروں کا
لیکن یہ رنگ بدلتے دن
لیکن یہ بھید بھری دنیا
اسی راکھ سے خاک سے ابھرے گی
کونپل کے سمان ہری دنیا
یہ وقت عجب مداری ہے
سو کھیل تماشے لاتا ہے
اک منظر ہنسنے والا ہے
اک منظر خون رلاتا ہے
اور وہ جو سب کا والی ہے
ہر منظر دیکھے جاتا ہے
پیرزادہ قاسم
Zalzala aath October 2005
Is roshan subah ke daaman mein
Ek suraj qahr ka chamka tha
Ek taara jee ka naghma tha
Jo waadi waadi goonja tha
Ek parwaayi thi wahshat ki
Ek fitrat ka naqqarah tha
Na-deeda tha woh dast-e-ajal
Jo dasht-o-jabal larzaata tha
Aur paaoñ tale se dharti ko
Be-wahm-o-gumaan sarkaata tha
Ek khel raha kuch lamhon ka
Kuch lamhe the jo aaye gaye
Sab nauhe neest ke nauhe the
Nabood ki taal pe gaaye gaye
Basti aur basti waale sab
Malbe ke tale dafnaye gaye
Ab jheelne waale jheeleñge
Jo dukh hai bichhadne waalon ka
Ek aag-e-firaq ki deheki hai
Yeh rasta hai angaaron ka
Bas is par chalna aur jalna
Maqdoor hai gham ke maaron ka
Lekin yeh rang badalte din
Lekin yeh bheed bhari duniya
Isi raakh se khaak se ubhre gi
Konpal ke samaañ hari duniya
Yeh waqt ajab madari hai
Sau khel tamaashe laata hai
Ek manzar hansne wala hai
Ek manzar khoon rulaata hai
Aur woh jo sab ka waali hai
Har manzar dekhe jaata hai
شاعر کے بارے میں
پیرزادہ قاسم رضا صدیقی اردو ادب کے ممتاز شاعر، دانشور، ماہرِ تعلیم اور سائنس دان ہیں جنہوں نے ادب اور علم دونوں میدانوں میں نمایاں خدمات انجام دی ہ...
مکمل تعارف پڑھیں