زندگی کو ایک خواب رائیگاں سمجھا تھا میں — پیرزادہ قاسم
شاعر
زندگی کو ایک خواب رائیگاں سمجھا تھا میں
زندگی کو ایک خواب رائیگاں سمجھا تھا میں
بے کراں تعبیر ہوگی یہ کہاں سمجھا تھا میں
راہ رو گزرے چلے جاتے تھے راہ زیست پر
اک ہجوم جسم و جاں کو کارواں سمجھا تھا میں
اتنی نزدیکی کہ جیسے چھو رہا ہوں خود کو میں
حرز جاں ہے وہ جسے وہم و گماں سمجھا تھا میں
تھا بہت سفاک تنسیخ تعلق کا فریب
اس کا عالم ہے جسے اپنا جہاں سمجھا تھا میں
بے طلب آسودہ کب ہوتی ہے کشت آرزو
بے گماں دل ہو رہے گا گلستاں سمجھا تھا میں
اک توقع تھی کہ یہ لہجہ بھی سمجھے گا کوئی
چشم خوں افشاں کو انداز بیاں سمجھا تھا میں
ربط باہم تھا فقط لفظ و بیاں کا ارتباط
ہے کوئی رسم وفا بھی درمیاں سمجھا تھا میں
اس قدر مانوس تھا فطرت کے لہجے کا جمال
سو اسے اپنا سخن اپنی زباں سمجھا تھا میں
یہ تو ہیں آئندگاں کی روشنی کے دائرے
ان کو اب تک اپنے قدموں کے نشاں سمجھا تھا میں
پیرزادہ قاسم
Zindagi ko ek khwab-e-raigan samjha tha main
Zindagi ko ek khwab-e-raigan samjha tha main
Be-karan ta'beer hogi yeh kahan samjha tha main
Raah-rau guzre chale jaate thhe raah-e-zeest par
Ek hujoom-e-jism-o-jaan ko karwaan samjha tha main
Itni nazdeeki ke jaise chhoo raha hoon khud ko main
Hirz-e-jaan hai woh jise wahm-o-gumaan samjha tha main
Tha bahut saffak tanseekh-e-ta'alluq ka fareb
Iska aalam hai jise apna jahan samjha tha main
Be-talab aasuda kab hoti hai kasht-e-aarzoo
Be-gumaan dil ho rahe ga gulistan samjha tha main
Ek tawaqqo thi ke yeh lahja bhi samjhe ga koi
Chashm-e-khoon afshaan ko andaaz-e-bayan samjha tha main
Rabt-e-baham tha faqat lafz-o-bayan ka irtibaat
Hai koi rasm-e-wafa bhi darmiyan samjha tha main
Is qadar manoos tha fitrat ke lahje ka jamaal
So usay apna sukhan apni zubaan samjha tha main
Yeh toh hain aaindgaan ki roshni ke daayre
In ko ab tak apne qadmon ke nishan samjha tha main
شاعر کے بارے میں
پیرزادہ قاسم رضا صدیقی اردو ادب کے ممتاز شاعر، دانشور، ماہرِ تعلیم اور سائنس دان ہیں جنہوں نے ادب اور علم دونوں میدانوں میں نمایاں خدمات انجام دی ہ...
مکمل تعارف پڑھیں