آخری پڑاؤ — سلیم فگار

Aakhiri Padaao

Shayad meri zameen
Apne safar ke aakhiri padaao se aage nikal chuki hai
Manzil par jalte hue falak-bos alaao ki hiddat kuch itni tez hai
Ke darakhton ke jadon se le kar
Shaakhon ke saron par aane wala boor tak
Pasine aur garmi se haanp raha hai
Waqt ki kathaali mein ubalte hue halaat ke saath
Ab ke kisi aqlmand ne hawa ke haath par rakhe hue
Tamaam mausam bhi utha kar daal diye hain
Mujhe yaad hai ke shaoor ki pehli seedhiyon par paaon rakhte hi
Kis asbiyat lamhe ne
Mere kaanon mein sargoshi ki thi
Ke tum apne baap ki paidaish se bhi bahut pehle girvi rakh diye gaye the
Main us din se le kar aaj tak bahi khaaaton ke
Qarz wale khaane se nahin nikal saka
Aur mere haathon mein itni be-ikhtiyaari bhar di gayi hai
Ke mere ghar ke darwaze ki chaabiyan har roz phisalti hui
Meri ungli ki aakhiri por par aa jaati hain
Aur main dehshat naak aankhon se khalaa mein dekhne lagta hoon
Ke jaise daur-e-ghulami ke siyah manzar
Aadhe se zyada darsi kitaabon se bahar nikal aaye hain
Khauf ke lambe naakhunon ne khaak-zadon ke badan ki mitti aise khurch di hai
Jaise makaanon ki deewaron ka kachcha rang
Tez baarishon mein utar kar naaliyon mein beh jaata hai
Gharon, mahalon aur sadkon par naadeeda deewarein itni oonchi utha di gayi hain
Ke hum ikkatthe rehte hue ek saath chalte hue bhi
Ek doosre ko dekh nahin sakte
Aur kya kahoon ke is saal dekhne, sunne aur bolne par bhi namkein laga diya gaya
Jaise hum sab apne apne badan mein tanha kar ke maar diye jaayenge
Woh ahad zyada door nahin
Jab humein koi nasal Mohenjo-Daro aur Harappa ki tarah daryaft kare gi
Soch raha hoon ke humein kitne foot gehra khod kar nikala jaayega
Aur phir museum mein rakhi hui sheeshe ki almaariyon mein
Purani haddiyon ke neeche yeh tehreer jab koi sayyah rakh kar padhe ga
Ke yeh us daur ka insaan tha jab tarraqi apne nuqta-e-urooj se bhi aage thi
Magar taleem yaafta is muashre ke log ghaaron mein rehne walon se zyada tehzeeb yaafta the
Yeh ek shaa'ir tha
Jo ehsaas ki qabr mein
Apni maut se pehle dafan kar diya gaya