مشورہ — سلیم فگار
شاعر
مشورہ
تو چھن گیا تو لگا جیسے
لکیریں میری ہتھیلی کے کاغذ سے گر گئی ہیں
اور ہاتھ کفن سے زیادہ
سفید ہو گئے ہیں
اب جانے کون سے لمحے کی پر کار
لائینوں کی عبارت دوبارہ لکھے
میں نے جیت ادھار تو نہیں مانگی تھی
ہجر کسی ظالم چودھری کی طرح
تمام وصل کا اناج اٹھا کر لے گیا ہے
اور بھوک جسم پہ بالوں کی طرح اگنے لگی ہے
وقت سے میرا مذاق کبھی نہیں رہا
پھر جانے کیوں
سب یہ مجھ سے کسی بہت قریبی دوست کی طرح
کھیلتا رہتا ہے
تیرے آنسو میری آنکھوں کو
نرگس کا سونپ کر گئے ہیں
جانے سرخ گلاب کا ذائقہ بینائی کب چکھے
سنو
رستے ابھی اپنے مسافر بھولے نہیں
لوٹ آؤ
ورنہ معلوم ہے تمہیں
اب نیا گھر بنتے دیر نہیں لگتی
رستے سکڑی ہوئی کلیاں
اور کھیت صحن بننے سے پہلے چلے آؤ
کہ طویل دوریاں
اپنے محور سے ہٹنے کے مترادف ہیں
اور مدار سے نکلے ہوئے چاند
ایک دن اخبار کی سرخی بن کر
باقی ردی کے بھاؤ بکتے ہیں
سلیم فگار
Mashwara
Tu chhin gaya to laga jaise
Lakeerein meri hatheli ke kaaghaz se gir gayi hain
Aur haath kafan se zyada
Safed ho gaye hain
Ab jaane kaun se lamhe ki pur-kaar
Line'on ki ibaarat dobaara likhe
Main ne jeet udhaar to nahin maangi thi
Hijr kisi zaalim chaudhry ki tarah
Tamaam vasl ka anaaj utha kar le gaya hai
Aur bhook jism pe baalon ki tarah ugne lagi hai
Waqt se mera mazaaq kabhi nahin raha
Phir jaane kyun
Sab yeh mujh se kisi bahut qareebi dost ki tarah
Khelta rehta hai
Tere aansoo meri aankhon ko
Nargis ka sonp kar gaye hain
Jaane surkh gulaab ka zaaiqa beenaai kab chakkhe
Suno
Raaste abhi apne musafir bhoole nahin
Laut aao
Varna maloom hai tumhein
Ab naya ghar bante der nahin lagti
Raaste sukdi hui kaliyan
Aur khet sehan banne se pehle chale aao
Ke taweel dooriyan
Apne mehwar se hatne ke mutradif hain
Aur madaar se nikle hue chaand
Ek din akhbaar ki surkhi ban kar
Baaqi raddi ke bhaao bikte hain
شاعر کے بارے میں
سلیم فگارؔ (اصل نام: محمد سلیم) اردو کے ایک اہم معاصر شاعر ہیں جن کی پیدائش 22 جون 1972ء کو جھیلم، پنجاب (پاکستان) میں ہوئی۔ انہوں نے ابتدائی زندگی...
مکمل تعارف پڑھیں