شہر انا میں — شہاب جعفری
شاعر
شہر انا میں
یہ تیز دھوپ یہ کاندھوں پہ جاگتا سورج
زمیں بلند ہے اتنی کہ آسماں کی رقیب
وہ روشنی ہے وہ بیداریاں کہ سائے نہ خواب
بس ایک ہوش بس اک آگہی بس اک احساس
اور ان کے نور سے جلتے بدن پگھلتے بدن
بدن ہیں کھولتے سیال آئینے ہر سو
ہر آن بہتے سدا ہیئتیں بدلتے بدن
دماغ دور سے ان کا نظارہ کرتا ہے
اور ان کے قرب کے اظہار سے سنورتا ہے
وہ روشنی ہے کہ از فرد تا بہ فرد تمام
کسی کی شکل نہ صورت کسی کا رنگ نہ روپ
تمام انفس و آفاق گم ہیں آپس میں
ہیں فرد فرد کی پرچھائیاں بھی دھوپ ہی دھوپ
سب اپنے علم کا جادوئے سامری لے کر
ہزار آنکھوں سے اک دوسرے کو دیکھتے ہیں
رواں دواں ہیں سب اک دوسرے کو دیکھتے ہیں
اور اتنا جان چکے ہیں سب ایک دوسرے کو
کچھ اتنی دور نکل آئے ہیں سب اپنے سے
کہ دل کے رشتوں کو اب مانتا نہیں کوئی
کسی کو اپنے سوا جانتا نہیں کوئی
شہاب جعفری
Shehr-e-Ana mein
Ye tez dhoop ye kaandhon pe jaagta sooraj
Zameen buland hai itni ke aasmaan ki raqeeb
Woh roshni hai woh bedaariyaan ke saaye na khwaab
Bas ek hosh bas ek aagahi bas ek ehsaas
Aur un ke noor se jalte badan pighalte badan
Badan hain khaultay siyaal aaine har soo
Har aan behte sada haiyatein badalte badan
Dimaagh door se un ka nazaara karta hai
Aur un ke qurb ke izhaar se sanwarta hai
Woh roshni hai ke az fard ta ba fard tamaam
Kisi ki shakal na soorat kisi ka rang na roop
Tamaam anfas-o-aafaaq gum hain aapas mein
Hain fard fard ki parchhaaiyaan bhi dhoop hi dhoop
Sab apne ilm ka jaadoo-e-saamiri le kar
Hazaar aankhon se ek doosre ko dekhte hain
Rawaan dawaan hi hain sab ek doosre ko dekhte hain
Aur itna jaan chuke hain sab ek doosre ko
Kuch itni door nikal aaye hain sab apne se
Ke dil ke rishton ko ab maanta nahin koyi
Kisi ko apne siwa jaanta nahin koyi
شاعر کے بارے میں
شہاب جعفری (اصل نام: سید وقار احمد جعفری) جدید اردو شاعری کے ممتاز اور صاحبِ فکر شاعر تھے۔ وہ 2 جون 1930ء کو بنارس (اتر پردیش، ہندوستان) میں پیدا ہ...
مکمل تعارف پڑھیں