سورج کا شہر — شہاب جعفری
شاعر
سورج کا شہر
''نہیں یہ سورج کے شہر کا آدمی نہیں ہے
کہ یہ تو مرنے کے بعد فٹ پاتھ پر پڑا ہے
یہ لاش ہم سب کی طرح سورج کے ساتھ گردش میں کیوں نہیں ہے؟
پڑھو تو اس ڈائری میں کیا ہے؟''
نچے کھچے اک ورق پہ کچھ یوں لکھا ہوا تھا
''میں اپنی دنیائے فکر و فن تج کے آج بن باس میں پڑا ہوں
ضرورتوں میں گھرا ہوا ہوں
یہاں تو دو اور دو کا حاصل ہمیشہ ہی چار ہاتھ آیا
کہ پانچ نا ممکنات میں ہے
عظیم فن کار کا قلم ہو کہ کارخانے
کسی کو تخلیق حسن کی آرزو نہیں ہے
مقدس آگ ان کے دل کی یوں پیٹ کے جہنم میں جل رہی ہے
کہ زندگی کی جو قوتیں ہیں وہ خود کو زندہ ہی رکھنے میں صرف ہو رہی ہیں
مشین کی طرح ذہن بھی کام کر رہے ہیں
رگوں میں جیتے لہو کے بدلے رقیق لوہا بھرا ہوا ہے
مشین کی طرح پانو چلتے ہیں
آدمی کا جلال گردش میں سرنگوں ہے
ارادہ و اختیار اک اضطراب سنگیں ہے جس سے بچ کر
کوئی نہیں دو گھڑی کسی سے جو بے غرض رک کے بات کر لے
(کسے خبر، آدمی کے دو میٹھے بول کو میں ترس گیا ہوں)''
یہاں یہ تحریر آنسوؤں سے مٹی ہوئی تھی اور اس سے آگے
''یہ شہر سورج کا شہر ہے اس کے روز و شب کا پتہ نہیں ہے
نہ آج تک وقت اور تاریخ کا مجھے علم ہو سکا ہے
کہ میرے احساس میں کوئی آج ہے نہ کل
اور یہ رات ہے یا سیاہ سورج؟
غروب ہو کر بھی آسمان و زمیں سے پیہم گزر رہا ہے
بس اس جہاں میں سیاہ و روشن ہمیشہ دن ہے
ہمیشہ سورج ہی اپنے سر پر کھڑا ہوا ہے
یہ کائنات اک شکستہ گاڑی ہے ایک پہیے پہ چل رہی ہے
زمین کا چاند کیا خبر کس اندھیرے پاتال میں گرا ہو
ہر ایک شے بھاگتی ہوئی ایک دوسرے کی تلاش میں گم
بس ایک تصادم
ہر ایک شخص ایک دوڑتی لاش ہے کہ اک دوسرے سے وحشت زدہ، گریزاں
سب اپنا سورج سے منہ چھپاے تلاش میں وقت کی ہراساں
کسی کو اتنی بھی شام ملتی نہیں کہ تھوڑا اداس ہو لیں''
یہاں پہ جملے عجیب سے تھے لہو کے دھبوں سے مٹ گئے تھے
شہاب جعفری
Sooraj ka Shehr
''Nahin ye sooraj ke shehr ka aadmi nahin hai
Ke ye to marne ke ba'd footpath par paRa hai
Ye laash hum sab ki tarah sooraj ke saath gardish mein kyon nahin hai?
PaRho to is diary mein kya hai?''
Niche khichRe ek waraq pe kuch yoon likha hua tha
''Main apni dunya-e-fikr-o-fan taj ke aaj banbaas mein paRa hoon
Zaruraton mein ghira hua hoon
Yahaan to do aur do ka haasil hamesha hi chaar haath aaya
Ke paanch na-mumkinaat mein hai
Azeem funkaar ka qalam ho ke kaarkhaane
Kisi ko takhleeq-e-husn ki aarzoo nahin hai
Muqaddas aag un ke dil ki yoon peT ke jahannum mein jal rahi hai
Ke zindagi ki jo quwwatein hain woh khud ko zinda hi rakhne mein sarf ho rahi hain
Machine ki tarah zehn bhi kaam kar rahe hain
Ragon mein jeete lahu ke badle raqeeq loha bhara hua hai
Machine ki tarah paaon chalte hain
Aadmi ka jalal gardish mein sarnigoon hai
Iraada-o-ikhtiyaar ek iztiraab-e-sangeen hai jis se bach kar
Koyi nahin do ghaRi kisi se jo be-gharaz ruk ke baat kar le
(Kise khabar, aadmi ke do meeThe bol ko main taras gaya hoon)''
Yahaan ye tehreer aansuon se miTi huyi thi aur is se aage
''Ye shehr sooraj ka shehr hai is ke roz-o-shab ka pata nahin hai
Na aaj tak waqt aur taareekh ka mujhe ilm ho saka hai
Ke mere ehsaas mein koyi aaj hai na kal
Aur ye raat hai ya siyaah sooraj?
Ghuroob ho kar bhi aasmaan-o-zameen se paiham guzar raha hai
Bas is jahaan mein siyaah-o-roshan hamesha din hai
Hamesha sooraj hi apne sar par khaRa hua hai
Ye kaainaat ek shikasta gaaRi hai ek pahiye par chal rahi hai
Zameen ka chaand kya khabar kis andhere paataal mein gira ho
Har ek shai bhaagti huyi ek doosre ki talaash mein gum
Bas ek tasaadum
Har ek shakhs ek dauRti laash hai ke ek doosre se wahshat-zada, gurezaan
Sab apna sooraj se munh chhupaye talaash mein waqt ki hiraasaan
Kisi ko itni bhi shaam milti nahin ke thoRa udaas ho lein''
Yahaan pe jumle ajeeb se the lahu ke dhabbon se miT gaye the
شاعر کے بارے میں
شہاب جعفری (اصل نام: سید وقار احمد جعفری) جدید اردو شاعری کے ممتاز اور صاحبِ فکر شاعر تھے۔ وہ 2 جون 1930ء کو بنارس (اتر پردیش، ہندوستان) میں پیدا ہ...
مکمل تعارف پڑھیں