ابلیس بھی رکھ لیتے ہیں جب نام فرشتے — شہزاد احمد
شاعر
ابلیس بھی رکھ لیتے ہیں جب نام فرشتے
ابلیس بھی رکھ لیتے ہیں جب نام فرشتے
میں کیوں نہ کہوں مجھ سے بھی ہیں خام فرشتے
وہ نور ہیں میں خاک ہوں لیکن مرے باعث
لیتے نہیں اک لمحہ بھی آرام فرشتے
تنہائی میں آ جاتی ہیں حوریں مرے گھر میں
چمکاتے ہیں مسجد کے در و بام فرشتے
اک میں ہی تو ہوں رات گئے جاگنے والا
سو جاتے ہیں بے ہوش سر شام فرشتے
جنت سے نکالا ہوا انسان وہی ہے
شیطان بنے بیٹھے ہیں ناکام فرشتے
ہوں اتنا گنہ گار کہ اللہ کے آگے
لیتے ہوئے ڈرتے ہیں مرا نام فرشتے
دنیا ہوئی آباد تو میرے ہی سبب سے
انجام نہ دے پائے کوئی کام فرشتے
کیا سوچ کے انسان سے شرمائے ہوئے ہیں
دیتے نہیں دیدار سر عام فرشتے
میں ایک گنہ گار نصیحت کا ہدف ہوں
دنیا میں بھی ملتے ہیں بہر گام فرشتے
یہ دختر رز دانۂ گندم تو نہیں ہے
چکھیں تو سہی بادۂ گلفام فرشتے
یوں غیب سے میں ڈھونڈ کے لایا ہوں مضامیں
جیسے کوئی لے آئے تہ دام فرشتے
جو بات مرے دل میں تھی آئی ہے زباں پر
اب کرتے پھریں گے مجھے بد نام فرشتے
شہزادؔ زمانہ ہوا لیکن مری جانب
لاتے نہیں اللہ کا پیغام فرشتے
Iblees bhi rakh lete hain jab naam farishte
Iblees bhi rakh lete hain jab naam farishte
Main kyun na kahoon mujh se bhi hain khaam farishte
Woh noor hain main khaak hoon lekin mere ba'is
Lete nahin ik lamha bhi araam farishte
Tanhai mein aa jaati hain hoorein mere ghar mein
Chamakate hain masjid ke dar-o-baam farishte
Ik main hi to hoon raat gaye jaagne wala
So jaate hain be-hosh sar-e-shaam farishte
Jannat se nikala hua insaan wohi hai
Shaitaan bane baithe hain nakaam farishte
Hoon itna gunahgaar ke Allah ke aage
Lete hue darte hain mera naam farishte
Duniya hui aabaad to mere hi sabab se
Anjaam na de paaye koi kaam farishte
Kya soch ke insaan se sharmaaye hue hain
Dete nahin deedaar sar-e-aam farishte
Main ek gunahgaar naseehat ka hadaf hoon
Duniya mein bhi milte hain bahar gaam farishte
Yeh dukhtar-e-raz dana-e-gandum to nahin hai
Chakhein to sahi baada-e-gulfam farishte
Yoon ghaib se main dhoond ke laya hoon mazameen
Jaise koi le aaye teh-e-daam farishte
Jo baat mere dil mein thi aayi hai zabaan par
Ab karte phirenge mujhe badnaam farishte
Shehzad zamana hua lekin meri jaanib
Laate nahin Allah ka paighaam farishte
شاعر کے بارے میں
شہزاد احمد 16 اپریل 1932ء کو امرتسر (برطانوی ہندوستان) میں پیدا ہوئے۔ ان کا اصل نام شہزاد احمد تھا اور ادبی دنیا میں بھی وہ اسی نام سے معروف ہوئے۔ ...
مکمل تعارف پڑھیں