میں جو روتا ہوں تو کہتے ہو کہ ایسا نہ کرو — شہزاد احمد
شاعر
میں جو روتا ہوں تو کہتے ہو کہ ایسا نہ کرو
میں جو روتا ہوں تو کہتے ہو کہ ایسا نہ کرو
تم اگر میری جگہ ہو تو بھلا کیا نہ کرو
اب تو اے دل ہوس ساغر و مینا نہ کرو
چھوڑ بھی دو یہ تقاضا یہ تقاضا نہ کرو
دل پہ اے دوست قیامت سی گزر جاتی ہے
تم نگاہ غلط انداز سے دیکھا نہ کرو
پھر بھی آنکھیں انہیں ہر بات بتا دیتی ہیں
دل تو کہتا ہے کسی بات کا چرچا نہ کرو
اب مرا درد مری جان ہوا جاتا ہے
اے مرے چارہ گرو اب مجھے اچھا نہ کرو
یہ سر بزم مری سمت اشارے کیسے
میں تماشا تو نہیں میرا تماشا نہ کرو
مل ہی جاتی ہے کبھی یاس میں تسکین مجھے
اے امیدو مجھے ایسے میں تو چھیڑا نہ کرو
اس نے شہزادؔ تری بات کو ٹھکرا ہی دیا
میں نہ کہتا تھا کہ اظہار تمنا نہ کرو
Main jo rota hoon to kahte ho ke aisa na karo
Main jo rota hoon to kahte ho ke aisa na karo
Tum agar meri jagah ho to bhala kya na karo
Ab to ae dil hawas-e-saghar-o-meena na karo
Chhoṛ bhi do ye taqaza ye taqaza na karo
Dil pe ae dost qayamat si guzar jaati hai
Tum nigah-e-ghalat andaaz se dekha na karo
Phir bhi aankhen unhen har baat bata deti hain
Dil to kahta hai kisi baat ka charcha na karo
Ab mera dard meri jaan hua jaata hai
Ae mere chara-garo ab mujhe achha na karo
Ye sar-e-bazm meri samt ishaare kaise
Main tamasha to nahin mera tamasha na karo
Mil hi jaati hai kabhi yaas mein taskeen mujhe
Ae ummeedon mujhe aise mein to chheṛa na karo
Us ne Shehzad teri baat ko thukra hi diya
Main na kahta tha ke izhar-e-tamanna na karo
شاعر کے بارے میں
شہزاد احمد 16 اپریل 1932ء کو امرتسر (برطانوی ہندوستان) میں پیدا ہوئے۔ ان کا اصل نام شہزاد احمد تھا اور ادبی دنیا میں بھی وہ اسی نام سے معروف ہوئے۔ ...
مکمل تعارف پڑھیں