جینے مرنے کے درمیان ایک ساعت — شہزاد احمد
شاعر
جینے مرنے کے درمیان ایک ساعت
کبھی جینے کبھی مرنے کی خواہش روک لیتی ہے
وگرنہ میں ہوا کی لہر میں تحلیل ہو جاؤں
کدھر جاؤں کہ ہر سو ساعتیں رستے کا پتھر ہیں
اگر بیٹھا رہوں تو راکھ میں تبدیل ہو جاؤں
وہ جادوگر تھا جس نے رات پر پہرے بٹھائے تھے
وگرنہ اب تلک یہ چاند تارے مٹ چکے ہوتے
جنون آگہی مانوس آنکھوں سے چھلک جاتا
بساط زندگی کے سارے مہرے پٹ چکے ہوتے
مجھے معلوم ہے اک چاند دن کو بھی نکلتا ہے
مجھے معلوم ہے راتیں بھی اک خورشید رکھتی ہیں
اگر یہ دونوں عالم ایک ہو جائیں تو پھر کیا ہو
ہوائیں رات دن یکتائی کی امید رکھتی ہیں
مگر ان وسعتوں کو کون بانہوں میں سمیٹے گا
کہاں سے آئے گی وہ روشنی جو منتہی ہوگی
دلوں کی تیرگی کچھ اور گہری ہوتی جاتی ہے
اذیت روشنی کی دن کی رگ رگ نے سہی ہوگی
کدھر جاؤں کہ ہر سو راستے کرنوں کی صورت ہیں
مگر کرنوں پہ چلنا بے قراری کو نہیں آتا
وہ نقطہ جس پہ میں ہوں مرقد شام غریباں ہے
مگر اس سمت کوئی آہ و زاری کو نہیں آتا
Jeene marne ke darmiyan ek saa'at
Kabhi jeene kabhi marne ki khwahish rok leti hai
Wagarna main hawa ki lehar mein tahlil ho jaun
Kidhar jaun ke har su saa'atein raste ka patthar hain
Agar baitha rahoon to raakh mein tabdeel ho jaun
Woh jadugar tha jis ne raat par pehre bithaaye the
Wagarna ab talak yeh chand taare mit chuke hote
Junoon-e-aagahi maanoos aankhon se chhalak jata
Bisaat-e-zindagi ke saare mohre pat chuke hote
Mujhe maloom hai ik chand din ko bhi nikalta hai
Mujhe maloom hai raatein bhi ik khursheed rakhti hain
Agar yeh dono aalam ek ho jayein to phir kya ho
Hawaayein raat din yaktaai ki umeed rakhti hain
Magar un wus'aton ko kaun baahon mein samete ga
Kahan se aaye gi woh roshni jo muntahi hogi
Dilon ki teergi kuch aur gehri hoti jaati hai
Aziyat roshni ki din ki rag rag ne sahi hogi
Kidhar jaun ke har su raaste kirno ki surat hain
Magar kirnon pe chalna be-qarari ko nahin aata
Woh nuqta jis pe main hoon marqad-e-shaam-e-ghareeban hai
Magar is simt koi aah-o-zaari ko nahin aata
شاعر کے بارے میں
شہزاد احمد 16 اپریل 1932ء کو امرتسر (برطانوی ہندوستان) میں پیدا ہوئے۔ ان کا اصل نام شہزاد احمد تھا اور ادبی دنیا میں بھی وہ اسی نام سے معروف ہوئے۔ ...
مکمل تعارف پڑھیں