رخصت ہوا تو آنکھ ملا کر نہیں گیا — شہزاد احمد
شاعر
رخصت ہوا تو آنکھ ملا کر نہیں گیا
رخصت ہوا تو آنکھ ملا کر نہیں گیا
وہ کیوں گیا ہے یہ بھی بتا کر نہیں گیا
وہ یوں گیا کہ باد صبا یاد آ گئی
احساس تک بھی ہم کو دلا کر نہیں گیا
یوں لگ رہا ہے جیسے ابھی لوٹ آئے گا
جاتے ہوئے چراغ بجھا کر نہیں گیا
بس اک لکیر کھینچ گیا درمیان میں
دیوار راستے میں بنا کر نہیں گیا
شاید وہ مل ہی جائے مگر جستجو ہے شرط
وہ اپنے نقش پا تو مٹا کر نہیں گیا
گھر میں ہے آج تک وہی خوشبو بسی ہوئی
لگتا ہے یوں کہ جیسے وہ آ کر نہیں گیا
تب تک تو پھول جیسی ہی تازہ تھی اس کی یاد
جب تک وہ پتیوں کو جدا کر نہیں گیا
رہنے دیا نہ اس نے کسی کام کا مجھے
اور خاک میں بھی مجھ کو ملا کر نہیں گیا
ویسی ہی بے طلب ہے ابھی میری زندگی
وہ خار و خس میں آگ لگا کر نہیں گیا
شہزادؔ یہ گلہ ہی رہا اس کی ذات سے
جاتے ہوئے وہ کوئی گلہ کر نہیں گیا
Rukhsat hua to aankh mila kar nahin gaya
Rukhsat hua to aankh mila kar nahin gaya
Woh kyon gaya hai yeh bhi bata kar nahin gaya
Woh yun gaya ke baad-e-saba yaad aa gayi
Ehsaas tak bhi hum ko dila kar nahin gaya
Yun lag raha hai jaise abhi laut aaye ga
Jaate hue charaagh bujha kar nahin gaya
Bas ek lakeer khench gaya darmiyaan mein
Deewar raaste mein bana kar nahin gaya
Shayad woh mil hi jaye magar justuju hai shart
Woh apne naqsh-e-pa to mita kar nahin gaya
Ghar mein hai aaj tak wahi khushboo basi hui
Lagta hai yun ke jaise woh aa kar nahin gaya
Tab tak to phool jaisi hi taza thi us ki yaad
Jab tak woh pattiyon ko juda kar nahin gaya
Rehne diya na us ne kisi kaam ka mujhe
Aur khaak mein bhi mujh ko mila kar nahin gaya
Waisi hi be-talab hai abhi meri zindagi
Woh khaar-o-khas mein aag laga kar nahin gaya
Shehzad yeh gila hi raha us ki zaat se
Jaate hue woh koi gila kar nahin gaya
شاعر کے بارے میں
شہزاد احمد 16 اپریل 1932ء کو امرتسر (برطانوی ہندوستان) میں پیدا ہوئے۔ ان کا اصل نام شہزاد احمد تھا اور ادبی دنیا میں بھی وہ اسی نام سے معروف ہوئے۔ ...
مکمل تعارف پڑھیں