دیکھتے دیکھتے منظر سے الگ ہو جانا — آفتاب حسین
شاعر
دیکھتے دیکھتے منظر سے الگ ہو جانا
دیکھتے دیکھتے منظر سے الگ ہو جانا
اندر اندر کہیں باہر سے الگ ہو جانا
خود کو ٹھکرا کے لپٹ جانا کسی سائے کے ساتھ
اور خود اپنی ہی ٹھوکر سے الگ ہو جانا
اپنی ہی دھن میں نکلتے چلے جانا کہیں اور
اور یوں اپنے ہی محور سے الگ ہو جانا
ایک عالم کو سمیٹے ہوئے رہنا خود میں
اسی عالم میں جہاں بھر سے الگ ہو جانا
لطف لیتے ہوئے پرواز کا اڑنا اور پھر
اڑتے اڑتے کبھی شہپر سے الگ ہو جانا
سانحہ ہے کہ رہائی مجھے معلوم نہیں
یہ مرا اپنے ہی اندر سے الگ ہو جانا
یہ بھی اک طرفہ ستم ہے کہ ہوا ہے مجھ پر
میرا اس دست ستم گر سے الگ ہو جانا
اس طرح سر مرا گھوما ہے کہ میں جانتا ہوں
میں کہ اب چاہتا ہوں سر سے الگ ہو جانا
سلسلہ اور ہی اب چاہیے مجھ کو یعنی
اس الگ ہونے کے چکر سے الگ ہو جانا
آفتاب حسین
Dekhte dekhte manzar se alag ho jaana
Dekhte dekhte manzar se alag ho jaana
Andar andar kahin bahar se alag ho jaana
Khud ko thukra ke lipat jaana kisi saaye ke saath
Aur khud apni hi thokar se alag ho jaana
Apni hi dhun mein nikalte chale jaana kahin aur
Aur yun apne hi mahvar se alag ho jaana
Ek aalam ko samete hue rahna khud mein
Isi aalam mein jahan bhar se alag ho jaana
Lutf lete hue parwaaz ka udna aur phir
Udte udte kabhi shahpar se alag ho jaana
Saneha hai ke rihai mujhe maloom nahin
Yeh mera apne hi andar se alag ho jaana
Yeh bhi ek tarfa sitam hai ke hua hai mujh par
Mera us dast-e-sitamgar se alag ho jaana
Is tarah sar mera ghooma hai ke main jaanta hoon
Main ke ab chahta hoon sar se alag ho jaana
Silsila aur hi ab chahiye mujh ko yaani
Is alag hone ke chakkar se alag ho jaana
شاعر کے بارے میں
آفتاب حسین معاصر اردو شاعری کا ایک معتبر اور منفرد نام ہیں جنہوں نے اپنی فکری گہرائی، داخلی کرب اور جدید حسیت کے ذریعے اردو غزل کو ایک نیا آہنگ عطا...
مکمل تعارف پڑھیں