دھیان میں آتی ہوئی دل میں لپکتی ہوئی ہے — آفتاب حسین
شاعر
دھیان میں آتی ہوئی دل میں لپکتی ہوئی ہے
دھیان میں آتی ہوئی دل میں لپکتی ہوئی ہے
روشنی دور بہت دور چمکتی ہوئی ہے
کیسی خوشبو ہے کہ سینے میں لیے پھرتا ہوں
کیا ہوا ہے کہ مرے سر میں سنکتی ہوئی ہے
چلتا جاتا ہوں اماوس کے گھنے جنگل میں
آگے آگے کوئی پائل سی چھنکتی ہوئی ہے
ایک تالاب کہ ہر رت میں بھرا رہتا ہے
ایک چھاگل کہ جو دن رات چھلکتی ہوئی ہے
بہکا بہکا ہوا پھرتا ہوں کسی دھیان کے ساتھ
اور یہ رات مرے ساتھ بھٹکتی ہوئی ہے
سر سلامت ہے تو سمجھو نہ سلامت مجھ کو
اندر اندر کوئی دیوار درکتی ہوئی ہے
یہ بھی کچھ کم تو نہیں عمر کے اس موسم میں
دل دھڑکتا ہوا ہے آگ دہکتی ہوئی ہے
آفتاب حسین
Dhyan mein aati hui dil mein lapakti hui hai
Dhyan mein aati hui dil mein lapakti hui hai
Roshni door bahut door chamakti hui hai
Kaisi khushboo hai ke seene mein liye phirta hoon
Kya hua hai ke mere sar mein sanakti hui hai
Chalta jata hoon amavas ke ghanay jangal mein
Aage aage koi payal si chhanakti hui hai
Ek talab ke har rut mein bhara rahta hai
Ek chhaghal ke jo din raat chhalakti hui hai
Bahka bahka hua phirta hoon kisi dhyan ke saath
Aur ye raat mere saath bhatakti hui hai
Sar salamat hai to samjho na salamat mujh ko
Andar andar koi deewar darakti hui hai
Ye bhi kuchh kam to nahin umr ke is mausam mein
Dil dhadakta hua hai aag dahakti hui hai
شاعر کے بارے میں
آفتاب حسین معاصر اردو شاعری کا ایک معتبر اور منفرد نام ہیں جنہوں نے اپنی فکری گہرائی، داخلی کرب اور جدید حسیت کے ذریعے اردو غزل کو ایک نیا آہنگ عطا...
مکمل تعارف پڑھیں