مرے لہو سے گزرتا ہوا ملا ہے مجھے — آفتاب حسین
شاعر
مرے لہو سے گزرتا ہوا ملا ہے مجھے
مرے لہو سے گزرتا ہوا ملا ہے مجھے
اب ایک عمر پہ جو راستہ ملا ہے مجھے
رواں رہے گا مرے دل میں زندگی کی طرح
جو ایک زہر بہ طور دوا ملا ہے مجھے
میں اس زمین و زمانہ پہ خاک ڈالتا ہوں
کہ تو ملا نہیں مجھ کو تو کیا ملا ہے مجھے
اب اس مقام پہ ہوں میں خبر نہیں مجھ کو
بچھڑ گیا ہے کوئی مجھ سے یا ملا ہے مجھے
میں آئنے کو کدورت سے کیا بچا پاتا
زمانہ گرد اڑاتا ہوا ملا ہے مجھے
اب آپ اپنا لہو چاٹتا ہوں سوچتا ہوں
بہت دنوں میں کہیں ذائقہ ملا ہے مجھے
زباں ہلی تو لبوں پر لگی ہے جبر کی مہر
جو چپ ہوا ہوں تو سنگ صدا ملا ہے مجھے
ملا ہی کیا مجھے تیرے بھرے خزانوں سے
یہ ایک دل کہ ترستا ہوا ملا ہے مجھے
خود اپنے آپ سے مل کر خوشی ہوئی ہے آج
چلو کہیں تو کوئی آشنا ملا ہے مجھے
رواں دواں ہوں میں ہرچند آفتاب حسینؔ
ہر اک قدم پہ کوئی سانحہ ملا ہے مجھے
آفتاب حسین
Mere lahoo se guzarta hua mila hai mujhe
Mere lahoo se guzarta hua mila hai mujhe
Ab ek umr pe jo raasta mila hai mujhe
Rawan rahega mere dil mein zindagi ki tarah
Jo ek zehar ba-taur-e-dawa mila hai mujhe
Main is zameen-o-zamana pe khaak dalta hoon
Ke tu mila nahin mujh ko to kya mila hai mujhe
Ab is muqaam pe hoon main khabar nahin mujh ko
Bichhad gaya hai koi mujh se ya mila hai mujhe
Main aaine ko kudurat se kya bacha pata
Zamana gard udata hua mila hai mujhe
Ab aap apna lahoo chaatta hoon sochta hoon
Bahut dinon mein kahin zaiqa mila hai mujhe
Zaban hili to labon par lagi hai jabr ki mohar
Jo chup hua hoon to sang-e-sada mila hai mujhe
Mila hi kya mujhe tere bhare khazanon se
Ye ek dil ke tarasta hua mila hai mujhe
Khud apne aap se mil kar khushi hui hai aaj
Chalo kahin to koi aashna mila hai mujhe
Rawan-dawan hoon main harchand Aftab Husain
Har ek qadam pe koi sanihah mila hai mujhe
شاعر کے بارے میں
آفتاب حسین معاصر اردو شاعری کا ایک معتبر اور منفرد نام ہیں جنہوں نے اپنی فکری گہرائی، داخلی کرب اور جدید حسیت کے ذریعے اردو غزل کو ایک نیا آہنگ عطا...
مکمل تعارف پڑھیں