شفا کی خاک تھی یا پھر ہنر کی مٹی تھی — آفتاب حسین
شاعر
شفا کی خاک تھی یا پھر ہنر کی مٹی تھی
شفا کی خاک تھی یا پھر ہنر کی مٹی تھی
سفر میں بھی مرے ہم راہ گھر کی مٹی تھی
یہ دھول بیٹھے کسی دن تو بیٹھ کر سوچیں
کہاں اڑی ہوئی تھی کس نگر کی مٹی تھی
کہیں وجود کے اندر بھی کوئی رستہ تھا
درون خانہ بھی کچھ رہ گزر کی مٹی تھی
سپیدۂ سحری تھا کہ میری آنکھوں میں
غبار خواب تھا اور رات بھر کی مٹی تھی
جو گرد رخ پہ تھی اشکوں نے صاف کی لیکن
پڑی رہی یوںہی سر پر جو سر کی مٹی تھی
یہ میں جو دھوپ میں جلتا تھا اور پھلتا تھا
مری سرشت میں شاید شجر کی مٹی تھی
عجب نہیں جو نہیں مجھ میں انکسار کی خو
مٹی مٹی سی مرے بام و در کی مٹی تھی
وہ شور جیسے سماعت میں کوئی شورش ہو
وہ گردباد کہ لگتا تھا شر کی مٹی تھی
مری اڑان کہ تھی سات آسمانوں تک
مری نظر میں مرے مستقر کی مٹی تھی
جو گرد اڑی بھی تو مخفی تھی چشم بدبیں سے
ہمارے عیب میں ایسی ہنر کی مٹی تھی
آفتاب حسین
Shifa ki khaak thi ya phir hunar ki mitti thi
Shifa ki khaak thi ya phir hunar ki mitti thi
Safar mein bhi mere humraah ghar ki mitti thi
Yeh dhool baithe kisi din to baith kar sochein
Kahan udi hui thi kis nagar ki mitti thi
Kahin wujood ke andar bhi koi rasta tha
Darun-e-khaana bhi kuch rahguzar ki mitti thi
Sapedah-e-sahri tha ke meri aankhon mein
Ghubar-e-khwab tha aur raat bhar ki mitti thi
Jo gard rukh pe thi ashkon ne saaf ki lekin
Padi rahi yunhi sar par jo sar ki mitti thi
Yeh main jo dhoop mein jalta tha aur phalta tha
Meri sarisht mein shayad shajar ki mitti thi
Ajab nahin jo nahin mujh mein inkisar ki kho
Mitti mitti si mere baam-o-dar ki mitti thi
Woh shor jaise sama'at mein koi shorish ho
Woh girdbad ke lagta tha shar ki mitti thi
Meri udaan ke thi saat aasmanon tak
Meri nazar mein mere mustaqar ki mitti thi
Jo gard udi bhi to makhfi thi chashm-e-bad-been se
Hamare aib mein aisi hunar ki mitti thi
شاعر کے بارے میں
آفتاب حسین معاصر اردو شاعری کا ایک معتبر اور منفرد نام ہیں جنہوں نے اپنی فکری گہرائی، داخلی کرب اور جدید حسیت کے ذریعے اردو غزل کو ایک نیا آہنگ عطا...
مکمل تعارف پڑھیں