یہ اور بات مکرر سنا گیا ہم سے — آفتاب حسین
شاعر
یہ اور بات مکرر سنا گیا ہم سے
یہ اور بات مکرر سنا گیا ہم سے
خود اپنا حال سنا کر سنا گیا ہم سے
ہم اس میں اپنی کہانی بھی ڈال دیتے تھے
وہ اک فسانہ کہ اکثر سنا گیا ہم سے
ہمارے گیتوں میں اشکوں کی آب داری تھی
سو جل ترنگ بجا کر سنا گیا ہم سے
تمام رات ستارے تھے گوش بر آواز
تمام رات برابر سنا گیا ہم سے
نظر میں رکھی تھی وہ آنکھ بولتی ہوئی آنکھ
ندی میں شور تھا گھر پر سنا گیا ہم سے
ہمارے زخم لکھے تھے زمیں کے ذروں میں
ہمارا درد فلک پر سنا گیا ہم سے
لہو میں اب بھی تلاطم مچائے رکھتی ہے
وہ اک صدا جسے کم تر سنا گیا ہم سے
یہی نہیں انہیں ہم خود سنانے جاتے تھے
ہمارے پاس بھی آ کر سنا گیا ہم سے
نظر میں اڑتی تھی ان دیکھے منظروں کی گرد
وہ رہ گزر تھی مگر گھر سنا گیا ہم سے
کبھی کبھی کوئی آواز دیکھنے میں آئی
کہیں کہیں کوئی منظر سنا گیا ہم سے
ہمارے پاس بھی اک زخم ہے دکھانے کو
اگر کبھی سر محشر سنا گیا ہم سے
آفتاب حسین
Ye aur baat mukarrar suna gaya hum se
Ye aur baat mukarrar suna gaya hum se
Khud apna haal suna kar suna gaya hum se
Hum is mein apni kahani bhi daal dete the
Woh ek fasana ke aksar suna gaya hum se
Hamare geeton mein ashkon ki aab-dari thi
So jal tarang baja kar suna gaya hum se
Tamaam raat sitare the gosh bar awaaz
Tamaam raat barabar suna gaya hum se
Nazar mein rakhi thi woh aankh bolti hui aankh
Nadi mein shor tha ghar par suna gaya hum se
Hamare zakhm likhe the zameen ke zarron mein
Hamara dard falak par suna gaya hum se
Lahoo mein ab bhi talatum machaaye rakhti hai
Woh ek sada jise kamtar suna gaya hum se
Yahi nahin unhein hum khud sunane jaate the
Hamare paas bhi aa kar suna gaya hum se
Nazar mein udti thi un dekhe manzaron ki gard
Woh rehguzar thi magar ghar suna gaya hum se
Kabhi kabhi koi awaaz dekhne mein aayi
Kahin kahin koi manzar suna gaya hum se
Hamare paas bhi ek zakhm hai dikhane ko
Agar kabhi sar-e-mahshar suna gaya hum se
شاعر کے بارے میں
آفتاب حسین معاصر اردو شاعری کا ایک معتبر اور منفرد نام ہیں جنہوں نے اپنی فکری گہرائی، داخلی کرب اور جدید حسیت کے ذریعے اردو غزل کو ایک نیا آہنگ عطا...
مکمل تعارف پڑھیں