اور کوئی جو سنے خون کے آنسو روئے (ردیف .. ن) — باقر مہدی
شاعر
اور کوئی جو سنے خون کے آنسو روئے (ردیف .. ن)
اور کوئی جو سنے خون کے آنسو روئے
اچھی لگتی ہیں مگر ہم کو تمہاری باتیں
ہم ملیں یا نہ ملیں پھر بھی کبھی خوابوں میں
مسکراتی ہوئی آئیں گی ہماری باتیں
ہائے اب جن پہ مسرت کا گماں ہوتا ہے
اشک بن جائیں گی اک روز یہ پیاری باتیں
یاد جب کوئی دلائے گا سر شام تمہیں
جگمگا اٹھیں گی تاروں میں ہماری باتیں
ان کو مغرور بنایا ہے بڑی مشکل سے
آئینہ بن کے رہیں کاش ہماری باتیں
ملتے ملتے یوں ہی بیگانے سے ہو جائیں گے
دیکھتے دیکھتے کھو جائیں گی ساری باتیں
وہ بہت سوچیں تڑپ اٹھیں مگر اے باقرؔ
یاد آئیں تو نہ آئیں یہ تمہاری باتیں
باقر مہدی
Aur koi jo sune khoon ke aansu roye (radeef .. n)
Aur koi jo sune khoon ke aansu roye
Achhi lagti hain magar hum ko tumhari baaten
Hum milen ya na milen phir bhi kabhi khwabon mein
Muskurati hui aayengi hamari baaten
Haay ab jin pe masarrat ka guman hota hai
Ashk ban jaayengi ek roz ye pyari baaten
Yaad jab koi dilaye ga sar-e-sham tumhen
Jagmagaa uthengi taaron mein hamari baaten
In ko maghroor banaya hai badi mushkil se
Aaina ban ke rahen kaash hamari baaten
Milte milte yun hi begane se ho jaayenge
Dekhte dekhte kho jaayengi saari baaten
Wo bahut sochen tadap uthen magar ai Baqir
Yaad aayen to na aayen ye tumhari baaten
شاعر کے بارے میں
باقر مہدی اردو کے معروف شاعر، نقاد، دانش ور اور جدید حسیت کے نمائندہ ادیب تھے، جنہوں نے اپنی بے باک فکر، خوددار مزاج اور غیر مصلحت پسند رویّے کے باعث اردو ادب میں منفرد مقام حاصل کیا۔ وہ 11 فروری 1927ء کو رُدولی، ضلع بارہ بنکی، اتر پردیش میں ایک علمی اور زمیندار گھرانے میں پیدا ہوئے۔ ان کے والد رزم رودولوی خود شاعر تھے، اس لیے گھر کا ماحول ادبی ...
مکمل تعارف پڑھیں