خوف — باقر مہدی
شاعر
خوف
سائے سائے جالے جالے خاموشی خاموشی سی
ٹوٹی ٹوٹی الجھی الجھی بے خوابی بے خوابی سی
حرفوں سے بچتا بچتا معنی سے چھپتا چھپتا
رنگوں میں ڈوبا ڈوبا سانسوں میں ابھرا ابھرا
ذروں میں چمکا چمکا لہروں میں سہما سہما
تیز ہوا کے جھونکوں میں رک رک کر اڑتا اڑتا
نشتر زہر محبت درد خون کے اک اک قطرے میں
رہ رہ کر چبھتا چبھتا
کیا ہے یہ
کون ہے یہ
آنسو ریت بنے کیسے پلکوں پہ چمکے کیسے
ہر منزل پر لہراتا ہے کب سے زرد پھریرا کون
ٹوٹے آدرشوں کے شیشے گنتا ہے وہ بیٹھا کون
میرے ہر اظہار میں پنہاں بے معنی خاموش کیوں
میرے تھک کے سو جانے میں خوابوں میں بے چینی کیوں
میرے بام سے اڑ جاتا ہے قطرہ قطرہ نشہ کیوں
یہ روز و شب سارے لمحے ننھے ننھے ٹکڑے ٹکڑے
رگ رگ میں پیوست ہوئے خون بنے درد بنے
اک مدت سے صبح ازل سے
میری روح میں کون چھپا ہے
کون چھپا ہے
باقر مہدی
Khauf
Saaye saaye jaale jaale khamoshi khamoshi si
Tooti tooti uljhi uljhi be-khwabi be-khwabi si
Harfon se bachhta bachhta maani se chhupta chhupta
Rangon mein dooba dooba saanson mein ubhra ubhra
Zarron mein chamka chamka lehron mein sehma sehma
Tez hawa ke jhonkon mein ruk ruk kar udta udta
Nishtar zehar mohabbat dard khoon ke ek ek qatre mein
Reh reh kar chubhta chubhta
Kya hai yeh
Kaun hai yeh
Aansu ret bane kaise palkon pe chamke kaise
Har manzil par lehraata hai kab se zard phirera kaun
Toote aadarshon ke sheeshe ginta hai woh baitha kaun
Mere har izhaar mein pinhan be-maani khamosh kyon
Mere thak ke so jaane mein khwabon mein be-chaini kyon
Mere baam se ud jaata hai qatra qatra nasha kyon
Yeh roz-o-shab saare lamhe nanhe nanhe tukde tukde
Rag rag mein paiwast hue khoon bane dard bane
Ek muddat se subh-e-azal se
Meri rooh mein kaun chhupa hai
Kaun chhupa hai
شاعر کے بارے میں
باقر مہدی اردو کے معروف شاعر، نقاد، دانش ور اور جدید حسیت کے نمائندہ ادیب تھے، جنہوں نے اپنی بے باک فکر، خوددار مزاج اور غیر مصلحت پسند رویّے کے باعث اردو ادب میں منفرد مقام حاصل کیا۔ وہ 11 فروری 1927ء کو رُدولی، ضلع بارہ بنکی، اتر پردیش میں ایک علمی اور زمیندار گھرانے میں پیدا ہوئے۔ ان کے والد رزم رودولوی خود شاعر تھے، اس لیے گھر کا ماحول ادبی ...
مکمل تعارف پڑھیں