جو زمانے کا ہم زباں نہ رہا — باقر مہدی
شاعر
جو زمانے کا ہم زباں نہ رہا
جو زمانے کا ہم زباں نہ رہا
وہ کہیں بھی تو کامراں نہ رہا
اس طرح کچھ بدل گئی ہے زمیں
ہم کو اب خوف آسماں نہ رہا
جانے کن مشکلوں سے جیتے ہیں
کیا کریں کوئی مہرباں نہ رہا
ایسی بیگانگی نہیں دیکھی
اب کسی کا کوئی یہاں نہ رہا
ہر جگہ بجلیوں کی یورش ہے
کیا کہیں اپنا آشیاں نہ رہا
مفلسی کیا گلہ کریں تجھ سے
ساتھ تیرا کہاں کہاں نہ رہا
حسرتیں بڑھ کے چومتی ہیں قدم
منزلوں کا کوئی نشاں نہ رہا
خون دل اپنا جل رہا ہے مگر
شمع کے سر پہ وہ دھواں نہ رہا
غم نہیں ہم تباہ ہو کے رہے
حادثہ بھی تو ناگہاں نہ رہا
قافلے خود سنبھل سنبھل کے بڑھے
جب کوئی میر کارواں نہ رہا
باقر مہدی
Jo zamane ka hum-zabaan na raha
Jo zamane ka hum-zabaan na raha
Wo kahin bhi to kaamran na raha
Is tarah kuchh badal gayi hai zamin
Hum ko ab khauf-e-asman na raha
Jaane kin mushkilon se jeete hain
Kya karen koi mehrbaan na raha
Aisi begaanagi nahin dekhi
Ab kisi ka koi yahan na raha
Har jagah bijliyon ki yurish hai
Kya kahen apna aashiyan na raha
Muflisi kya gila karen tujh se
Saath tera kahan kahan na raha
Hasraten badh ke choomti hain qadam
Manzilon ka koi nishan na raha
Khoone dil apna jal raha hai magar
Shama ke sar pe wo dhuan na raha
Gham nahin hum tabah ho ke rahe
Hadisa bhi to nagahaan na raha
Qaafle khud sambhal sambhal ke badhe
Jab koi meer-e-karwan na raha
شاعر کے بارے میں
باقر مہدی اردو کے معروف شاعر، نقاد، دانش ور اور جدید حسیت کے نمائندہ ادیب تھے، جنہوں نے اپنی بے باک فکر، خوددار مزاج اور غیر مصلحت پسند رویّے کے باعث اردو ادب میں منفرد مقام حاصل کیا۔ وہ 11 فروری 1927ء کو رُدولی، ضلع بارہ بنکی، اتر پردیش میں ایک علمی اور زمیندار گھرانے میں پیدا ہوئے۔ ان کے والد رزم رودولوی خود شاعر تھے، اس لیے گھر کا ماحول ادبی ...
مکمل تعارف پڑھیں