رات لمبی تھی ستارہ مرا تعجیل میں تھا — نعمان شوق
شاعر
رات لمبی تھی ستارہ مرا تعجیل میں تھا
رات لمبی تھی ستارہ مرا تعجیل میں تھا
جس کو جلنا نہیں آیا وہی قندیل میں تھا
اک جہاں اور پس کار جہاں تھا باقی
اک بدن اور مرے عشق کی تکمیل میں تھا
پھر سیاہی نے سمیٹا مرا سامان آ کر
کل اثاثہ مرا اک شام کی زنبیل میں تھا
ایک لرزہ تھا ستاروں کے بدن پر طاری
میں تو ڈوبا ہوا اک حسن کی تفصیل میں تھا
اب تو ہر چہرہ اسے زرد دکھائی دے گا
دیر تک آئینہ بیمار کی تحویل میں تھا
جو ملا وہ بڑی عجلت میں ملا تھا مجھ سے
اور میں گویا ہمیشہ سے ہی تعطیل میں تھا
نعمان شوق
Raat lambi thi sitara mera ta'jeel mein tha
Raat lambi thi sitara mera ta'jeel mein tha
Jis ko jalna nahin aaya wahi qandeel mein tha
Ek jahan aur pas-e-kar-e-jahan tha baqi
Ek badan aur mere ishq ki takmeel mein tha
Phir siyahi ne sameta mera saman aa kar
Kul asasa mera ek sham ki zanbeel mein tha
Ek larza tha sitaron ke badan par tari
Main to dooba hua ek husn ki tafseel mein tha
Ab to har chehra use zard dikhai dega
Der tak aaina bimaar ki tehveel mein tha
Jo mila woh baDi ijlat mein mila tha mujh se
Aur main goya hamesha se hi ta'teel mein tha
شاعر کے بارے میں
نعمان شوق (پیدائش: 2 جولائی 1965ء، آرا ضلع بھوجپور، بہار، بھارت) اردو کے اہم معاصر شعرا میں شمار ہوتے ہیں، جو اپنے منفرد اور مابعد جدید اسلوب کے با...
مکمل تعارف پڑھیں