تنہا نہیں ہوں گر دل دیوانہ ساتھ ہے — نظم طباطبائی
شاعر
تنہا نہیں ہوں گر دل دیوانہ ساتھ ہے
تنہا نہیں ہوں گر دل دیوانہ ساتھ ہے
وہ ہرزہ گرد ہوں کہ پری خانہ ساتھ ہے
ہنگامہ اک پری کی سواری کا دیکھنا
کیا دھوم ہے کہ سیکڑوں دیوانہ ساتھ ہے
دل میں ہیں لاکھ طرح کے حیلے بھرے ہوئے
پھر مشورہ کو آئینہ و شانہ ساتھ ہے
روز سیہ میں ساتھ کوئی دے تو جانیے
جب تک فروغ شمع ہے پروانہ ساتھ ہے
دیتا نہیں ہے ساتھ تہی دست کا کوئی
جب تک کہ مے ہے شیشہ میں پیمانہ ساتھ ہے
سیکھا ہوں میکدہ میں طریق فروتنی
جب تک کہ سر ہے سجدۂ شکرانہ ساتھ ہے
جو بے بصر ہیں ڈھونڈتے پھرتے ہیں دور دور
اور ہر قدم پہ جلوۂ جانانہ ساتھ ہے
کیا خوف ہو ہمیں زن دنیا کے مکر کا
اپنی مدد کو ہمت مردانہ ساتھ ہے
غم کی کتاب سے دل صد پارہ کم نہیں
جس بزم میں گئے یہی افسانہ ساتھ ہے
مانند گرد باد ہوں خانہ بدوش میں
صحرا میں ہوں مگر مرا کاشانہ ساتھ ہے
Tanha nahin hoon gar dil-e-dewana saath hai
Tanha nahin hoon gar dil-e-dewana saath hai
Wo harza-gard hoon ke pari-khana saath hai
Hangama ek pari ki sawaari ka dekhna
Kya dhoom hai ke saikadon dewana saath hai
Dil mein hain lakh tarah ke heele bhare hue
Phir mashwara ko aaina o shana saath hai
Roz-e-siyah mein saath koi de to jaaniye
Jab tak farogh-e-shama hai parwana saath hai
Deta nahin hai saath tahi-dast ka koi
Jab tak ke may hai shisha mein paimana saath hai
Seekha hoon maykada mein tareeq-e-furotani
Jab tak ke sar hai sajda-e-shukrana saath hai
Jo be-basar hain dhundte phirte hain dur dur
Aur har qadam pe jalwa-e-janana saath hai
Kya khauf ho humein zan-e-dunya ke makr ka
Apni madad ko himmat-e-mardana saath hai
Gham ki kitab se dil-e-sad-para kam nahin
Jis bazm mein gaye yahi afsana saath hai
Manind-e-gard-e-baad hoon khana-badosh main
Sahra mein hoon magar mera kashana saath hai
شاعر کے بارے میں
نظم طباطبائی اردو ادب کے اُن معتبر اور نستعلیق لہجے کے حامل شعرا میں شمار ہوتے ہیں جنہوں نے غزل اور نظم دونوں میں کلاسیکی جمالیات کو جدید عصری حسّی...
مکمل تعارف پڑھیں